සීනි සඳහා පනවා තිබූ පාලන මිල ඉවත් කිරීමට රජය තීරණය කර තිබේ.

සීනි ආනයනයකරුවන් සහ මුදල් අමාත්‍ය බැසිල් රාජපක්ෂ මහතා අතර පැවති සාකච්ඡාවකින් අනතුරුව මෙම තීරණය ගෙන ඇතැයි වාර්තා වේ.

අදාළ සාකච්ඡාවේදී සීනි ආනයනයකරුවන් පෙන්වා දී ඇත්තේ, වෙළෙඳ පොළේ සිනි අලෙවි කෙරෙන මිලත් ඩොලර් අර්බුදයත් හේතුවෙන් සිනි ආනයනය කිරීමේදී ඔවුන් දැඩි අපහසුතාවකට පත්වී ඇති බව ය.

ඒ අනුව, ඔවුන් ඉල්ලා ඇත්තේ සිනි සඳහා පනවා ඇති පාලන මිල ඉවත් කරන ලෙස ය.

ආරංචි මාර්ග සඳහන් කළේ, ඊට මුදල් අමාත්‍ය බැසිල් රාජපක්ෂ මහතා සිය එකඟතාව පළ කර ඇති බව ය.

සුදු සීනි කිලෝග්‍රෑමයක උපරිම සිල්ලර මිල රුපියල් 122ක් ලෙසත් පැකට් කළ සුදු සිනි කිලෝග්‍රෑමයක උපරිම සිල්ලර මිල රුපියල් 125ක් ලෙසත් පාලන මිලක් පනවමින් පාරිභෝගික කටයුතු පිළිබඳ අධිකාරිය සැප්තැම්බර් 2 වන දා ගැසට් පත්‍රයක් නිකුත් කළේ ය.

ඒ අනුව, සුදු සීනි කිලෝග්‍රෑමයක උපරිම තොග මිල රුපියල් 116ක් ලෙස දැක්විණි.

මේ අතර, වෙළෙඳපොළේ සීනි හිඟයක් මතුවී ඇතැයි පාරිභෝගිකයෝ චෝදනා කරති.

 

තමීනා රාසික්