නව වසර සැමරීමට  කිරිබත් සහ කැවිලි පෙවිලි ලබා ගැනීම සඳහා   රජයේ සහ පෞද්ගලික ආයතන ලබාදී ඇති ඇණවුම් බාර ගැනීම  හෝටල් සහ ආපනශාලා  සහ කැවිලි පෙවිලි නිෂ්පාදනය කරන ආයතන බොහොමයක් ප්‍රතික්ෂේප කර ඇතැයි වාර්තා වේ.

මේ සම්බන්ධයෙන් අදහස් දැක්වූ සමස්ත ලංකා ආපනශාලා හිමියන්ගේ සංගමයේ සභාපති අසේල සම්පත් මහතා පැවසුවේ ගෑස් හිඟය නිසා  හෝටල් ආපන ශාලා ඇතුළු ආයතනවලට  අකමැත්තෙන් වුව එම තීරණය ගැනීමට සිදුවී ඇති බවයි.

පවතින ආර්ථික තත්වය  සැලකිල්ලට ගෙන රජයේ සහ පෞද්ගලික ආයතන බොහොමයක් කිරිබත්, කැවිලි පෙවිලි ඇතුළු ආහාර ද්‍රව්‍ය මෙවර ඇණවුම් කර නැතැයිද  හෙතෙම සඳහන් කළේය.

රජයේ සහ පෞද්ගලික ආයතන බොහොමයක් නව වසර සැමරීමට කිරිබත් සහ කැවිලි පෙවිලි ලබා ගැනීම සඳහා කාලයක සිටම ඇණවුම් ලබා දුන්නේ ඒ ඒ  නගරවල හෝටල්වලට සහ ආපන ශාලාවලට බව සමස්ත ලංකා ආපනශාලා හිමියන්ගේ සංගමය පවසයි.

මේ අතර ගෑස් හිඟය නිසා මේ වනවිට වැසීගොස් ඇති හෝටල් , බේකරි සහ ආපන ශාලා සංඛ්‍යාව 20,000ක් දක්වා ඉහළ ගොස් ඇතැයි  එම සංගමය සඳහන් කරයි.

මෙයට අමතරව කඩල කරත්ත, බඩ ඉරිගු කරත්ත, සව් කරත්ත යනාදී ව්‍යාපාර දස දහසකට ආසන්න සංඛ්‍යාවක් ගෑස් හිඟය නිසා සම්පූර්ණයෙන්ම අඩාළවී ඇතැයි වාර්තා වේ.

සුජිත් හේවාජුලිගේ 

රූපවාහිනි නාලිකාවක දිනපතා විකාශය වන ප්‍රසිද්ධ ඉන්දියානු ටෙලි නාට්‍යයක චරිත දෙකක් වන ශිවන්යා සහ ෂේෂා සියසින් දැක බලා ගැනීම සදහා ඉන්දියාවට යාමට නිවසෙන් පැන ගිය ගැහැණු දරුවන් තිදෙනකු හොරොව්පොතාන නගරයේ දී අද (31) දහවල් සොයාගත් බව හොරොව්පොතාන පොලිසිය කියයි.

දරුවන්ගේ දෙමාපියන් විසින් පොලිසියට සිදුකරණ ලද පැමිණිල්ලකට අනුව සිදුකරන ලද විමර්ශනයකදී එලෙස පොලිස් භාරයට ගනු ලැබුවේ හොරොව්පොතාන, පහල කුබුගොල්ලෑව,ඉදිපිටිය ප්‍රදේශයේ පදිංචි අවුරුදු 8, 12, සහ 13 යන වයස් සීමාවන්වල පසුවන ගැහැනු දරුවන් තිදෙනෙකි.

අද (31) අලුයම 4:30 ට පමණ මෙම දරුවන් දෙමව්පියන්ට හොරෙන් නිවසින් පැන ගොස් ඇති බව පොලිසිය කියයි.

නිවසේ සිට කිලෝමීටර් දෙකක් පමණ වල් අලි ගහන කැලෑවක් මැදින් දිවෙන මාර්ගයක වැලිමුවපොතාන හන්දිය දක්වා පාගමනින් පැමිණ ඇති දරුවන් එතනදී ත්‍රිකුණාමලය සිට යාපනය බලා ගමන් කළ ලංගම බස් රථයකට අළුයම පහයි හතළිස් පහට පමණ ගොඩ වී ඇති බව පොලීසිය කියයි.

පසුව එම බස් රථයෙන් කැබිතිගොල්ලෑව නගරයට පැමිණි ඇති දරුවන් යළි කැබිතිගොල්ලෑවේ සිට කහටගස්දිගිලිය නගරය දක්වා දිවෙන බස් රථයකින් කහටගස්දිගිලිය නගරයට පැමිණ තිබේ. මාර්ගය වැරදුනු බව දැනගත් ඔවුන් යළිත් කාහටගස්දිගිලිය නගරයෙන් හොරොව්පොතාන බලා දිවෙන බස් රථයකය නැග  හොරොව්පොතාන  නගරයට පැමිණ යාපනයට යෑම සදහ  යාපනය බස් නවත්වන ස්ථානයෙ සිටියදී අද  (31) දහවල් 10:30 ට පමණ පොලීසිය විසින් සොයාගෙන තිබේ. 

කලක සිට ශිවන්යා බැලීමට තමන් සැලසුම් කර තිබුණ බවත් ඔවුන් සිටින්නේ ඉන්දියාවේ බැවින් ඉන්දියාවට යෑමට ආසන්නම නගරය යාපනය බව යහලුවෙකු පැවසූ නිසා මුලින්ම යාපනය නගරයට ගොස් බෝට්ටුවකින් ඉන්දියාවට යාම තම අරමුණ වූ බවත් පොලිස් භාරයට ගත් දරුවන් ප්‍රශ්න කිරීමේ දී පවසා ඇත. ඊට පෙර දෙමවුපියන්ගේ ඡංගම දුරකතන භාවිත කර ඉන්දියාව පිහිටි ස්ථානය පිළිබඳ  අවබෝධයක් තමන් ලබා  සිටි බවද පවසා ඇති ඔවුන් ඒ සඳහා දීර්ඝ කාලයක සිට මුදල් එකතු කර ලග තාබාගෙන සිටි බවද  පොලිසියට   පවසා තිබේ.

පොලිස් භාරයට ගත් දරුවන් ඔවුන්ගේ දෙමව්පියන් ගෙන්වා දැඩිව අවවාද කිරීමෙන් පසු යලි භාර දිමට කටයුතු කර තිබූ අතර ස්ථානාධිපති ප්‍රධාන පොලිස් පරීක්ෂක නවීන් ඉන්ද්‍රජිත් දායානන්ද මහතාගේ අධීක්ෂණය යටතේ අපරාධ අංශයේ ස්ථානාධිපති පොලිස් පරීක්ෂක ගාමිණී ජයවර්ධන, ළමා හා කාන්තා කාර්යාංශයෙ ස්ථානාධිපතිනි සැරයන් (1801) රංජනී,(35911) පුෂ්පකුමාර,(55687) රාජපක්ෂ,කාන්තා පොලිස්(8595) සංජීවනී යන නිලධාරීහු සිද්ධියට අදාළ පරීක්ෂණ සිදු කළහ.

පැතුම් දර්ශන

 

   

තනි එන්ජින් ගුවන් යානයකින් ලොව වටා සංචාරය කරමින් ලෝක වාර්තාවක් තැබීමට සැරෙසන බෙල්ජියම් ජාතික ළාබාලතම ගුවන් නියමුවරිය සාරා රදෆර්ඩ්  මෙනවිය (30දා) උදෑසන නවයට පමන රත්මලාන ගුවන්තොටින් ඉන්දියාවේ කොයිම්බතුර් බලා යළි ගමන් ඇරඹුවාය.

ඇය ලංකාවේ දින දෙකක් ගත කල අතර  එහිදී ලංකාවේ තේ බොහොම රසවත් බවත් එම අත්දැකීම ඇයගේ සිත් ඇදගත් බවත් ඇය පැවසීය.

ඇයගේ චාරිකාවේදී ලංකාව 40 වැනි රට වු අතර ඉන්දියාව 41 වන රට ලෙස සනිටුහන්ව ඇත.  ගුවන් නියමු පවුලකින් පැවත එන සාරා තවත් රටවල් 12කට යාමට නියමිතය.

මොරටුව රේඛා තරංගනී ෆොන්සේකා.

ත්‍රිකුණාමලය තෙල් ටැංකි සංකීර්ණයේ මේ වන විටත් ලංකා ඉන්දියන් ඔයිල් සමාගම (එල්.අයි.ඕ.සී.) බාරයේ තිබෙන තෙල් ටැංකිවල බදු කාලය තවත් වසර 50 කින් දීර්ඝ කරන බව බලශක්ති අමාත්‍ය උදය ගම්මන්පිල මහතා පවසයි.

යොහාන් භාසුර

මෙරටින් තවත් ඔමික්‍රෝන් ආසාදිතයින් 41ක් හමු වී ඇති බව ආචාර්ය චන්දිම ජීවන්දර මහතා පවසයි.

ආචාර්ය චන්දිම ජීවන්දර මහතා වැඩිදුරටත් පවසන්නේ මෙරට සමස්ත ඔමික්‍රෝන් ආසාදිතයින් සංඛ්‍යාව 45ක් බවය.

ට්විටර් පණිවුඩයක් නිකුත් කරමින් ඒ මහතා වැඩිදුරටත් ඉල්ලා ඇත්තේ තමන්ගේ සහ ආදරණීයන්ගේ ආරක්ෂාව වෙනුවෙන් හැකි ඉක්මණින් සියලුම දෙනා බූස්ටර් එන්නත් මාත්‍රාව ලබාගන්නා ලෙසටය. 

මේ අතර ඊයේ දිනයේ තවත් කොවිඩ් මරණ 18ක් වාර්තා වී තිබුණි.

පසුගිය 29 වන දිනට අදාල එම මරණ තහවුරු කර ඇති බවයි රජයේ ප්‍රවෘත්ති දෙපාර්තමේන්තුව සදහන් කළේය.

ඒ අනුව මෙරට සමස්ත කොවිඩ් මරණ සංඛ්‍යාව 14,962 දෙනෙකු දක්වා ඉහළ ගොස් තිබේ.

මේ අතර ඊයේ දිනයේ මෙරටින් නව කොවිඩ් ආසාදිතයින් 563 දෙනෙකු හදුනාගෙන තිබුණි.

ඒ අනුව මෙරට සමස්ත කොවිඩ් ආසාදිතයින් සංඛ්‍යාව පන් ලක්ෂ 86,746 දෙනෙකු දක්වා ඉහළ ගොස් තිබේ.

 

දිවයින පුරා භූමිතෙල් ළිප්වල හිඟයක්

ගෑස් හිඟය හේතුවෙන් මේ දිනවල කොළඹ සුපිරි වෙළෙඳසල්වල රාක්ක තුළ දර හා මැටි වළං අසුරා තිබුණු අයුරු පෙනෙන්නට තිබෙනවා.

පවතින ගෑස් හිඟය හා ගෑස් පිපිරීමේ සිදුවීම් දිගින් දිගට ම වාර්තා වීමත් සමඟ මහජනයා මෙම විකල්ප ක්‍රමවේද සිය දෛනික කටයුතු සඳහා භාවිත කිරීමට පෙළඹි ඇති බවකි පෙනෙන්නට ඇත්තේ.

මීට පෙර දිවයින පුරා භූමිතෙල් ළිප්වල හිඟයක් ද ඇති වුණේ, මෙම ගෑස් ආශ්‍රීත ව පැන නැඟුණු අර්බුද හමුවේ යි.

අසභ්‍ය ප්‍රකාශන තහනම් කිරීම් පනත් කෙටුම්පත පිළිබඳ ගැසට් නිවේදනය බල රහිත කර තිබේ.

මේ සම්බන්ධයෙන් සිවිල් සංවිධාන සහ උනන්දුවක් දක්වන විවිධ පාර්ශවයන් විසින් ඉදිරිපත් කරන ලද කරුණු සැළකිල්ලට ගෙන මෙම තීරණය ගෙන ඇත.

කෙසේ වෙතත් අධිකරණ අමාත්‍යංශය නිවේදනයක් නිකුත් කරමින් පවසන්නේ මෙම නීතිය ගෙන ඒමට හේතු වූයේ බාලවයස්කාර දරුවන්ගේ සුභසිද්ධිය හා හිංසනයට ලක්වන කාන්තාවන්ගේ පෞද්ගලිකත්වය ආරක්ෂා කිරීම සඳහා බවය.

සිවිල් සංවිධාන සහ වෙනත් පාර්ශවයන් එහිදී පෙන්වා දී ඇත්තේ මෙවැනි නීතියක් සම්පාදනය කිරීමේදී නිර්මාණකරුවන්ගේ ප්‍රකාශන අයිතිය පිළිබඳව විශේෂයෙන් සැළකිලිමත් වියයුතු බවය.

මේ පිළිබඳව සලකාබැලීමෙන් අනතුරුව අධිකරණ අමාත්‍ය අලි සබ්රී මහතා විසින් එම අමාත්‍යංශයට අදාළ ගැසට් නිවේදනය බල රහිත කරන ලෙසට දැනුම්දී තිබේ.

එහිදී අමාත්‍යවරයා විසින් වැඩිදුරටත් දැනුම් දී ඇත්තේ සිවිල් සංවිධාන, ශ්‍රී ලංකා නීතීඥ සංගමය, අපරාධ නීති ප්‍රතිසංස්කරණ අනු කමිටුව සහ මේ පිළිබඳව උනන්දුවක් දක්වන පාර්ශවයන්ගෙන් අදහස් ලබාගැනීමෙන් අනතුරුව සංශෝධිත පනත් කෙටුම්පතක් අමාත්‍ය මණ්ඩලය වෙත නැවත ඉදිරිපත් කරන ලෙසය.

බංග්ලාදේශයෙන් ලබාගත් ඩොලර් මිලියන 200 මූල්‍ය පහසුකම පියවීම සඳහා ශ්‍රී ලංකාව තවත් අමතර මාස තුනක සහන කාලයක් ඉල්ලා තිබේ. අග්‍රාමාත්‍ය මහින්ද රාජපක්ෂ මහතා කළ ඉල්ලීමට බංග්ලාදේශ අගමැතිනී ෂෙයික් හෂීනා මහත්මිය එකඟ වී ඇතැයි පාර්ලිමේන්තු මන්ත්‍රී හර්ෂද සිල්වා මහතා පවසයි.

බංග්ලාදේශ මෙම මූල්‍ය පහසුකම පසුගිය අගෝස්තු මාසයේදී ශ්‍රී ලංකාවට ලබාදුන්නේ අදියර තුනකිනි. බංග්ලාදේශ බැංකුව විසින් මෙම මූල්‍ය පහසුකම ශ්‍රී ලංකාවට ලබාදුන්නේය.

ශ්‍රී ලංකාව මේ වන විට දැඩි ආර්ථික අර්බුදයකට මුහුණපාමින් සිටින අතර නිල සංචිතය ඇමෙරිකානු ඩොලර් බිලියන 1.5ක් දක්වා පහළ ගොස් තිබේ.

කොවිඩ් වසංගත තත්ත්වය යටතේ ශ්‍රී ලංකාවේ නිල විදේශ සංචිතය ඒ ආකාරයට පහළ බැස්සත් බංග්ලාදේශයේ විදෙස් සංචිතය ඇමෙරිකානු ඩොලර් බිලියන 46.3ක් දක්වා අඛණ්ඩව ඉහළ ගොස් තිබේ.

 

කිතුණු බැතිමතුන් ගේ අප්‍රමාණ භක්ති ආදරයට පාත්‍ර වූ මැවුම්කාර දෙවියන් වහන්සේ ජේසු සමිඳානන් ලෙස මිනිස් ස්වරූපයෙන් මනු ලොව බිහි වීමේ මංගල්‍යය නත්තලයි. මීට අවුරුදු 2021 ට පෙර  වූ ඒ අසිරිමත් සිදු වීම ලොවපුරා කිතුනුවෝ අදත් මහත් හරසරින් සමරති.

ගලීලයට අයත් නාසරෙත් නම් නගරයේ ‘මරියා’ නම් යුවතියක් වාසය කළා. දිනක් ඇය යාච්ඤා කරමින් සිටියදී හදිසි ආලෝකයක් ඇතිවුණා. ඈ හිස ඔසවා බැලුවා. ඈ ඉදිරිපිට දේව දූතයෙක් සිටියා.

මේ හදිසි දර්ශනයෙන් ඇය බොහෝ සේ තැතිගත්තා. “මරියාණෙනි, බිය නොවන්න. ඔබ දෙවියන් වහන්සේගෙන් වරප්‍රසාද ලද්දෙහිය. ඔබ පිළිසිඳගෙන පුතෙකු ලබන්නේය. උන්වහන්සේට ජේසුස් යන නාමය තබන්න” දෙවියන් වහන්සේට කීකරු දිවියක් ගතකළ මරියා දේව කැමැත්ත සතුටින් භාර ගත්තා.

තමා විවාහ ගිවිසාගෙන සිටි යුවතිය ගැබ්ගෙන ඇති බව දැනගත් ජෝෂප් බෙහෙවින් කලකිරීමට පත් වුණා. ඔහු රහසේම ඇය අත්හැරදැමීමට තීරණය කළා. එහෙත් දේව දුතයෙක් සිහිනෙන් ඔහුට දර්ශනය වී සියල්ල පැහැදිලි කළා.

මරියාගෙ ප්‍රසව කාලය සම්පූර්ණ වීමට ආසන්නව පැවැති සමගේ අගෝස්තුස් අධිරාජ්‍යයා ජන සංගණනයක් පැවැත්වීමට නියම කර තිබුණා. සියලුදෙනාම සංගණනය සඳහා තම තමුන්ගේ නුවරවලට යාම අනිවාර්‍යය වුණා. දාවිත්ගේ වංශයට අයත්ව සිටි ජෝශප්ට තමුන්ගේ වංශයට අයත් නගරය වන බෙත්ලෙහෙමට මරියාත් සමග පිටත් වුණා.

ඔවුන් බෙත්ලෙහෙමට ළඟා වනවිට රෑබෝවීමට ආසන්න වුණා. රාත්‍රී නවාතැනක් සොයාගතයුතුව තිබුණා. එහෙත් බෙත්ලෙහෙමට දුරබැහැරින් පැමිණි ජනතාවගෙන් ලැඟුම්හල්, තානායම් පිරී පැවතුණා. මරියාගේ ප්‍රසව වේදනාව උත්සන්න වේගෙන එද්දී අන්තිමේදී ඔවුන්ට ගවමඩුවක් හමු වුණා. සීතලෙන් පිරුණු රාත්‍රියේ එළු බැටළුවන්ගෙන් පිරි මඩුවේ පිදුරු අතර ඔවුන් නවාතැන් ගත්තා. රාත්‍රියේ මරියාට ප්‍රසව වේදනා ඇතිවුණා. ඇය පුතෙකු බිහිකොට රෙදිවලින් ඔතා ගව ඔරුවේ නිදි කෙරෙව්වා.

ඒ යාමයේ එඬේරු තමුන්ගේ බැටළුවන් රකිමින් අසල තණ පිට්ටනියක ගිනිමැලයක් වටා රැස්වී සිටියා. හදිසියේ ඔවුන් මැදට දේවදූතයෙක් පැමිණියා. “බිය නොවන්න. මුළු ජනතාවටම ප්‍රීතියට හේතුවන පුවතක් ගෙනාමි. දාවිත්ගේ නුවර ඔබ හට ගැළවුම්කාරයෙක් උපන්නේය. යන්න…. රෙදිවලින් ඔතා ගවඔරුවක තබා ඇති බිළිඳෙක් ඔබට සම්බ වේවි.”

මෙයින් පුදුමයට පත්වුන එඬේරු කතාවේ ඇත්ත නැත්ත බැලීමට තීරණය කළා. රාත්‍රිය පුරා අහසේ දේව දූතයන්ගේ ගායනා හඬ ඔවුන්ට ඇසුනා. දේවදූතයා කියූ සළකුණු ඔස්සේ පැමිණි එඩේරු බිළිඳා දැකගත්තා.

එදින රාත්‍රියේ කවදාවත් නොදුටු තාරකාවක් අහසේ පායා තිබිණි. එය දුටු පෙරදිග ශාස්ත්‍රවන්තයෝ තිදෙනෙක් තම ශ්‍රාස්ත්‍රයේ අරුතින් එය වටහාගෙන “ජුදෙව්වරුන්ට රජව උපන් උතුමාණෝ උපන්නේ කොහේද? යැයි අසමින් ගලීලය වෙත ආහ.

මඟදී ඔවුන්ට තරුව නැවත දර්ශනය විය. ඔවුහු ඒ අනුව ගොස් බිළිඳා දැකගත්හ. ගෙනා පඬුරු වූ රන් ද, තුවරලා ද, ගන්ධරස ද පූජා කළහ.

මේ අයරින් දිලුදු පවුලක, ගවහලක ඉපදෙමින් මහෝත්තම දෙවියන් මිනිසුන් අතරට පැමිණීම මහත් වූ ප්‍රේමයේ සලකුණක් ලෙස කිතුනුවෝ විශ්වාස කරයි. එහෙයින්ම ඔවුන් මහත් හරසරින් දෙවු සමිදානන්ගේ මනුලෝකප්‍රප්තිය සමරයි.

අපේ රටේ පවා උදුවප් මාසය ළඟාවත්ම කිතුණුවෝ නත්තලයට සැරසෙති. ගෙවල් සුද්ධ පවිත්‍රකරමින්, අලංකාර කරනවාක් මෙන්ම වයින්, නත්තල් කේක් යන මුලික රස කෑම වර්ගද උදුවපට මාස දෙක තුනක සිට පිළියල වෙයි. නත්තල ලං ලං වෙත්ම නිවෙස් තුළ පිළියෙල වන කැවිලි වර්ගත්, සමග මුහු වී නත්තල ආසන්න වෙත්ම කිතුනු නිවෙස් වලින් වහනය වන නත්තල් සුවද අන්‍යාගමිකයින් සිතු තුළද ඇති කරන්නේ පුදුමාකාර ප්‍රබෝධමත් හැඟීමක්.

නත්තලට දවසක් විතර තියෙද්දී නිවසට ගෙන එන නත්තල් ගහේ සුවද පෙරකී සුවද තවත් විචිත්‍රවත් කරන අතර සයිප්‍රස් සුවඳ මුසු වූඒ සුවඳ සැබෑ ක්‍රිස්මස් සුවඳ ලෙස නම් කළහොත් එහා වරදක් නැත.

නත්තල ගැන කතා කරන විට නත්තල් සීයා ගැන කතා නොකරම බැහැ. කුඩා දරුවන් බෙහෙවින් ඇලුම් කරනා චරිතයක් වන නත්තල් සීයාගෙන් තෑග්ගක් ලබා ගැනීමට ආගම් භේදයකින් තොරව සියලුදෙනාම ප්‍රිය කරනවා. හොඳ ළමයින්ට හොරෙන්ම ඇවිත් තෑගි බෝග දෙනවා කියන විශ්වාසය නිසා නත්තල් කාලේ දරුවන්ගේ හිතේ ඇති කරන්නේ පුදුමාකාර බලාපොරොත්තුවක්. නත්තලේ තිබෙන බෙදාහදා ගැනීමේ සතුට හොඳින් පිළිබිඹු කරන චරිතය තමයි මේ නත්තල් සීයා.

අද වෙනකොට නත්තලේ සැබෑ අරුත වැසී නත්තල ප්‍රභල ලෙස වාණිජකරණය වී ඇත. එහෙත් ඔබට පුලුවන්නම්

*කෙනෙකුගේ මුවට සිනහවක් එක් කරන්න.

* ඔබව ප්‍රකෝප කරන අයකුට පවා ඉවසීමෙන් හා කරුණාවෙන් ප්‍රතිචාර දකවන්න.

* කිසිදා ඔබේ සමාව නොගන්නා කෙනෙකුට හදවතින්ම සමාව දෙන්න.

* කිසිවක් බලාපොරොත්තු නොවී තවකෙකුට ඔබේ කාලය දෙන්න.

සාමයේ කුමරු නොහොත් ජේසු බිලිඳුන් මෙලොවට වැඩිම සෑබෑ ලෙසම අරුත් ගැන්වීමට අපට හැකි ය.

ක්‍රිස්තුස් වහන්සේගේ ධර්මය නම් ප්‍රේමය යි. එම නිසා නත්තල යනු සාමයේ සමය ලෙස සලකන්න. ප්‍රේමය හා සාමය බෙදාගැනීමේ මංගල්‍යය වන නත්තලේ සැබෑ කිතු උපත සිදුවන්නේ නිහතමානි ආදරවන්ත සිත් තුළ පමණක් බව වටහා ගන්න.

ඔබ සැමට සිරි සුබ නත්තලක් වේවා!

ලබන්නා වූ 2022 නිදුක් නිරෝගී වාසනාවන්ත සුබම සුබ නව වසරක් වේවා!

නුවරඑළිය ග්‍රේගරි වැවේ ජලය හිස් කිරිම නිසා තමන් දැඩි පීඩාවට පත් වී ඇති බව ග්‍රේගරි වැවේ බෝට්ටු සේවා සංගමයේ සමාජිකයන් කියා සිටියි.

නුවරඑළිය මහ නගර සභාව විසින් පාලනය කරනු ලබන ග්‍රේගරි වැවේ ඉවුරේ ඇවිදින මංතිරුවක් ඉදි කිරිම ඇතුළු ග්‍රේගරි වැව සංවර්ධන කරන බව පවසමින් නුවරඑලිය මහ නගර සභාව විසින් (22දා) සිට වැවේහි ජලය හිස් කිරිමට පියවර ගෙන ඇති බවයි එම සංගමයේ සමාජිකයන් කියා සිටින්නේ.

කොවිඩ් 19 වෛරසය පැතිර යාමේ අවධානමත් සමග මාස කිහිපයක් තිස්සේ නුවරඑළිය සංචාරකයන් නොපැමිණිම නිසා තමන් කල රැකියාවෙන් තාවකාලිකව ඉවත් වි සිටි බවත්, 2021 නොවැම්බර් මස සිට සංචාරකයන් නුවරඑලියට පැමිණිමත් සමග සෞඛ්‍ය මාර්ග උපදෙස් වලට අනුව යළිත් බෝට්ටු සේවාව පවත්වාගෙන යන අතරතුර වැවේහි ජලය හිස් කිරීමට නුවරඑළිය මහ නගර සභාව කටයුතු කර ඇති බවද එම සංගමයේ සමාජිකයන් කියා සිටියි.

මේ දිනවල නුවරඑළියට  විශාල දෙස් විදෙස් සංචාරකයන් පිරිසක් පැමිණෙන බවත්,එම සංචාරකයන්ට පවත්වා තත්ත්වය මත ග්‍රේගරි වැවේහි විනෝද විමට අවස්තාවක් නොලැබිම තුලින් එම කාර්මාන්තයේ යෙදි සිටි සමාජිකයන් 175 දෙනෙකු පමණ දැඩි පිඩාවට පත් වි සිටින බවයි නුවරඑළිය ග්‍රේගරි වැවේහි සංචාරක බෝට්ටු සංගමයේ සමාජිකයන් කියා සිටින්නේ.

මේ දිනවල ගෑස් සම්බන්ධයෙන් මතුවී ඇති ගැටලු හේතුවෙන් ජනතාව භූමිතෙල් ලිප් භාවිතයට වැඩි වශයෙන් යොමුව සිටින නිසා භූමිතෙල් ලබාගැනීමට පැමිණි පිරිස් හේතුවෙන් ඇතැම් ඉන්ධන පිරවුම්හල් අසල  දිගු පෝලිම් පැවතිණි.

ගෑස් සිලින්ඩර පිපිරීමේ තත්වය හේතුවෙන් ඇතිවූ බිය සහ ගෑස් හිඟය හේතුවෙන් බොහෝ දෙනෙක් භූමිතෙල් ලිප් භාවිතයට යොමුවිය.

ගෑස් හිඟය ද තවමත් පවතින අතර ඉදිරියේදී ඉන්ධන හිඟයක් ඇතිවනු ඇතැයි පවතින ප්‍රචාර හේතුවෙන් ද ජනතාව බියට පත්ව සිටින බැවින් භූමිතෙල් රැස්කර තබාගැනීමට උනන්දු වන බව පෙනේ.

මේ හේතුවෙන් ජනතාව භූමිතෙල් ලබාගැනීම සඳහා විශාල ප්‍රමාණයේ කෑන් රැගෙන ඉන්ධන පිරවුම්හල් අසල දිගු පෝලිම්වල රැඳී සිටිනු දක්නට ලැබිණි.

ඩයනා උදයංගනී

ඡායාරූප ශාන්ත රත්නායක

අද රටට වෙලා තියෙන දේ හරියටම කියන නිසාද?

මං මේ ලිපිය පටන් ගන්නේ දීපාල් සිල්වා මහත්තයගෙ සින්දුවකින්. ඒකෙ කිව්වේ, ‘මේ රටේ මිනිස්සු තනිකර කෙළින්නෙ පිස්සු’ කියලා. ‘ඔළුව තදින් නරක් වෙච්ච – මිනිසුන් පිරිසක් හැදිච්ච – අරුම පුදුම රටක් තියෙනවා ඕයි… මහ මුහුදින් වට කෙරිච්ච – අඹ ගෙඩියක හැඩය වෙච්ච – ඒකට මරු නමක් කියනවා ඕයි…’ කිව්වම මතක් වෙන්නෙ මොන රටද?

කාට මොනව මතක් වුණත් අපට නම් මතක් වෙන්නේ අතිඋතුම් ශ්‍රී ලංකාව. මේ රමණීය දේශය. පිස්සු කෙළින මිනිස්සු. තමන්ගෙ දේශපාලකයොත් එක්ක කොච්චර නාඩගම් නටනවද කියලා අපි දන්නවා. කොළේ වහල කතාකරලා වැඩක් නෑ. ඒවා එළිපිට කතා කරන්න ඕනෙ දේවල්. සමහර වෙලාවට අපේ ගෙදරටත් මොනව හරි අරියාදුවක් එයි. අපට ඉතින් වෙන්න තියෙන අරියාදු ඔක්කොම වෙලා ඉවර හින්දා අලුතෙන් වෙන්න දෙයක් නෑ. අපේ රටේ මිනිස්සු තනිකර කෙළින්නෙ පිස්සු කියන එක ආයෙ අමතුවෙන් කියන්න දේකුත් නෑ. පස්සෙ දීපාල් සිල්වාට තගක් දාලා ‘මේ රටේ මිනිස්සු තනිකර කෙළින් මිනිස්සු’ කියලා කියාගත්තට ඒක කාගෙ හරි පොඩි ආතල් එකක් විතරයි. අපි හැමදාම මේ මනරම් පුරේ අපූරු රටේ ඉපදෙන්න මතු වාසනා කිය කිය හිටියට මේකෙ වාසනාලා ඉන්නේ එකයි. ඒ කතරගම ඇතා විතරයි. අනෙක් ඔක්කොම වාසනාට වඩා අවාසනාව කරපින්නා ගත්ත මිනිස්සු. වාසනා කියන නම දාගත්තු කීපදෙනා ඇරුණම අනෙක් ඔක්කොටම දැන් තියෙන්නේ යන එන මං නැතිවෙලා නන්නත්තාර වෙලා පිස්සු පීකුදු වෙලා. ඒක හින්දා නිකන් බොරුවට බයිලා ගහලා වැඩක් නෑ. කාලයක් තිස්සේ අපි සින්දු තහනම් කළා. සින්දු තහනම් කරලා රට හදන්න පුළුවන් නම් ඔක්කොම සින්දු ටික තහනම් කරන්න කියලා අපි අපේ දේශපාලකයන්ට යෝජනා කරනවා. නන්දා මාලනී ‘පවන’ කැසට් එක ගහපු වෙලාවෙ පවනෙ තිබුණු දේශානුරාගයට බයවෙලා අපේ කට්ටිය පවන තහනම් කළා. අපේ කපුගේ මහත්තයගෙ‘කම්පන’ ප්‍රසංගයට පුදුම විදියෙ විරෝධය ආවා. හැබැයි ‘මේ රටේ කැලෑ තුළ සිංහ පැටව් නැත උන් රට අතැර ගොසින්’ කියලා නන්දා මාලනී කියපු කතාව තාමත් ඇත්ත. මේකෙ සිංහ පැටව් නෑ. සත්තු වත්තෙ ඉන්න කීපදෙනා ඇරුණම අනෙක් එවුන් ඔක්කොම සිංහ හම් පොරවගත්ත බැටළුවො. සමහර එවුන් බැටළුවොත් නෙවෙයි නරි. තැන් තැන්වල වේදිකාවල උඩුබුරලනව හූ කියනවා ඇහුණම අපේ එවුනුත් රැලට ගිහිල්ලා හූ කියනවා. හැබැයි ඒ වුණාට අපට යන එනමං නැති වෙනකොට අපට ඇත්ත තේරෙන්න පටන් ගන්නකොට කරන්නේ මේ වගේ නෙයිනාඩගම් තමයි. පහුගිය දවසක ‘ලක්ෂෙට කොඩිය’ චිත්‍රපටයට 1970දි රචනා කරපු ගීතයක් අපේ ප්‍රධාන මාධ්‍ය ආයතනයක තහනම් කරනවා. ඒක අමරදේව මාස්ටර්ගෙ සංගීතයෙන් හැඩවුණු, අමරදේව මාස්ටර්ගෙම සහෝදරයෙක් වුණු බී.ටී. මෙන්ඩිස් විසින් රචනා කරපු ගීතයක්. ඒ ගීතයෙ තියෙන වචන ටික අපි අහලා ඉමු. මොකද මේවා තහනම් කළාට මේ වචන ටිකේ පොඩි ජොලියක් තියෙනවා කියලා හිතිච්ච හින්දා ඒ වචන ටික එකින් එක ඔබට කියල තියන්නම්.

‘රට බල්ලට ගියාදෙන්

ඇත්ත නැත්ත

කියන කලට

කට කන්නද අපේ දැන්

මගේ වැඩෙත්

හරි යා නම්,

උඹේ වැඩෙත්

හරි යා නම්,

කල්ලියටම හරි යා නම්,

ලොක්කො බක්කො

හුඟ දෙනෙක්ම

උන්ගෙම මඩි

තරි කරන්නේ

ඉතින් අපේ නායකයොත්

අපෙ උන්ගෙම

බෙලි කපන්නෙ

අපිත් කියලා නිකං ඉඳලා

වෙන මොනවද

දැන කරන්නේ

ඉතිං එහෙම රට කාලා

අප කෙරුවෝතින් ඇත්තට

අපොයි අමාරුවේ නේද

දරුමල්ලන් හැම ඇත්තට

ඒ හින්දම අප විහින්ම

නස්පැත්තිය

ළඟා නොකර

මේ රටේම සුබසිද්ධිය

ඇතිකරවමු

නොගා කෙකර

රට සරුවී වැඩීයන්

ලොවට නිවට

නොවන ලෙසට

කිරි පැණියෙන් පිරීයන්

මගේ වැඩෙත්

හරි යා දෙන්

නුඹේ වැඩෙත්

හරි යා දෙන්

කොයි කාටත්

හරි යා දෙන්

රට කන හැටි රොත්තම

කොනක ඉඳන්

වඳ කරන්න

පිටත් කරමු අවීචියට

කල්ප ගණන්

වද විඳින්න…’

මේක තමයි සින්දුව. ශේෂා පලිහක්කාර අධ්‍යක්ෂණය කරපු, කේ. ගුණරත්නම් නිෂ්පාදනය කරපු චිත්‍රපටයක් තමයි ‘ලක්ෂෙට කොඩිය’ කියලා කියන්නේ. ඒ කාලෙ ලංකාවෙ තිබුණු දේශපාලන ප්‍රවාහය මේ විදියට ඔවුන් විවේචනයට ලක් කළාට දන්නා තරමින් නම් ඒ අයව තහනම් වුණේ නෑ. හැබැයි අද වෙද්දී මේක තහනම් කරන්න අපේ ගුවන්විදුලි මහ ගෙදරින් තීන්දුවක් අරගෙන තියෙනවා කියලා ආරංචියි. ඒකෙ ඇත්ත නැත්ත අපි දන්නේ නෑ. කොහොම නමුත් සින්දු තහනම් කරලා මිනිසුන්ට දැනෙන එක, හැඟෙන එක, පේන එක තහනම් කරන්න පුළුවන් නම් තව ටික කාලෙකින් පුළුවන් විදියට අපි ඇස් පේන එකත් තහනම් කරමු. කන් ඇහෙන එකත් තහනම් කරමු. බලන එක, දකින එක, අහන එක තහනම් කරලා දාලා මේ රට අලුත් රටක් කරන්න පුළුවන් නම් අපිත් ඇස් පියාගෙන ඉමු. අපිත් කන් වහගෙන ඉමු. හැබැයි අවාසනාවට වෙලා තියෙන්නේ ඇස් පියාගෙන කන් වහගෙන ඉන්න බැරි තරමට දැන් තත්ත්වෙ බරපතළ වෙලා. ඒ නිසා මේ මනරම් පුරේ, මරනම් දේශයේ ඉපදෙන්න මතු වාසනා කියලා ඉවර කරන්න බැරි තැනට ප්‍රශ්නෙ ඔඩුදුවලා ඉවරයි. කවුරුහරි කියනවා නම් එහෙම නෑ කියලා එහෙම කෙනකුටත් අලුත් සින්දුවක් ලියලා පොඩි ජොලියක් ගන්න පුළුවන්.

කොහොම නමුත් දැන් ඉස්සර වගේ නෙවෙයි නෙ. ගුවන්විදුලියට අරකට මේකට සින්දු තහනම් කරන්න පුළුවන් වුණාට මිනිස්සු සින්දු අහන එක නවත්තන්න බෑ. කවදාවත් අහලා නොතිබිච්ච සින්දුවක් මේ ලියුම්කරු වෙච්ච මම ඇහුවෙත් මේ කතන්දරෙන් පස්සෙයි. හැබැයි මේ කාලෙ විදියට ගැළපෙන මරු සින්දු ටිකක් නැත්තෙ නෑ. නන්දා මාලනී ගායනා කරන මහාචාර්ය සුනිල් ආරියරත්න මහතා රචනා කරන ලද මේ ගීතය ගැන මොකද හිතෙන්නේ?

‘රට කරවන්න නම් මසුරන් ඇතිව කැටේ

වටිනා කියන දේ විකිණිය යුතුය රටේ

අමන දනන් කෑගැහුවත් හතර වටේ

ඒවා නොවික්කොත් අපි හැම මකර කටේ…’

තහනම් කරනව නම් තහනම් කරන්න කොච්චර සින්දු තියෙනවද නේද? සින්දු නෙවෙයි මහත්තයො තහනම් කරන්න ඕනෙ බයිලා. මොකද දේශපාලකයො හැම වෙලාවෙම බයිලා කියනවා. ඒ බයිලා අහගෙන අපිත් මේ රටේ නාඩගම් නටනවා. ජවුසම් නටනවා. කෝළම් නටනවා. නාඩගම්, ජවුසම්, කෝළම් කියලා කියන්නේ මේ රටේ තියෙන එක්තරා විදියක නාට්‍ය විශේෂයක්. ඒවා මේ රට ඇතුළේ තියෙන ඉතා ඉහළ සංස්කෘතිකාංග. අපේ මේ සංස්කෘතිකාංගවලටත් අපහාස වන විදියට නාඩගම් නටන මහත්වරු අපේ රටේ ඉන්නවා. අපට නම් හිතෙන්නේ මේ සින්දු තහනමත් එහෙම නාඩගමක් කියලා. කොහොම නමුත් මේ විදියේ තහනම් තහංචි දාපු ඉතිහාසයක් අපේ රටට තියෙනවා. කොහොම කොහොම හරි තහනම් තහංචි දාලා නතර කරනව නම් නතර කරන්න ඕනෙ සින්දු නෙවෙයි මේ රටේ දේශපාලකයො කියන බයිලා. ඒ බයිලාවලින් පස්සේ මේ රටට වෙන විපත මිනිහෙක් කවියකින්, කලාවකින්, අකුරකින්, චිත්‍රයකින්, පොතකින්, නවකතාවකින්, කෙටිකතාවකින් කිව්වට පස්සේ ඒ සාහිත්‍යයට තහංචි දාන එක, නිර්මාණකරුවන්ට තහංචි දාන එක රටක තියෙන චින්තනමය දුප්පත්කමේ ලක්ෂණයක්. පාලකයන්ගෙ තියෙන අදක්ෂකමේ ප්‍රතිඵලයක්. මේවා කළේ කවුරු වුණත් මේවා වෙන්නේ ඒ විදියටයි කියලා අපි ඔබට මතක් කරනවා.

පුළුවන් නම් මේ ගීතය හොයාගෙන අහන්න, මාරු ජොලියක් එන්නෙ. පද රචනය බී.ටී. මෙන්ඩිස්, තනුව සහ සංගීතය පණ්ඩිත් අමරදේව සූරීන්ගේ. ගායනය අයිවෝ ඩෙනිස්, සී.ටී. ප්‍රනාන්දු ඇතුළු පිරිස.

ජීවන් පහන් තිළිණ

2021 වසරේ නොවැම්බර් මාසයේ දී ජාතික පාරිභෝගික මිල දර්ශකය මත පදනම් වූ වාර්ෂික සාමාන්‍ය මතුපිට උද්ධමනය සියයට 6.2 දක්වා ඉහළ ගොස් ඇති අතර වාර්ෂික ලක්ෂ්‍යමය මතුපිට උද්ධමනය සියයට 11.1 දක්වා ඉහළගොස් තිබේ.

ශ්‍රී ලංකා මහබැංකුව, සංඛ්‍යාන දෙපාර්තමේන්තුව නිකුත් කළ නිවේදනයක් උපුටා දක්වමින් මේ බව ප්‍රකාශ කර තිබේ.

එම සම්පූර්ණ නිවේදනය පහතින්.

ජාතික පාරිභෝගික මිල දර්ශකයෙහි (ජා.පා.මි.ද., 2013=100) වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, 2021 ඔක්තෝබර් මාසයේ පැවති සියයට 8.3හි සිට 2021 නොවැම්බර් මාසයේ දී සියයට 11.1 දක්වා ඉහළ ගියේය. මේ අතර, වාර්ෂික සාමාන්‍ය පදනම මත මනිනු ලබන ජා.පා.මි. දර්ශකයෙහි වෙනස, 2021 ඔක්තෝබර් මාසයේ පැවති සියයට 5.7හි සිට 2021 නොවැම්බර් මාසයේ දී සියයට 6.2 දක්වා ඉහළ ගියේය.

උද්ධමනය සඳහා ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ මාසික ඉහළ යෑම් හේතු විය. ඒ අනුව, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ දී පැවති සියයට 11.7හි සිට 2021 නොවැම්බර් මාසයේ දී සියයට 16.9 දක්වා ඉහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ පැවති සියයට 5.4හි සිට 2021 නොවැම්බර් මාසයේ දී සියයට 6.2 දක්වා ඉහළ ගියේය.

2021 නොවැම්බර් මාසයේ දී ජා.පා.මි. දර්ශකයෙහි මාසික වෙනස සියයට 3.14ක් ලෙස වාර්තා වූ අතර, ආහාර සහ ආහාර නොවන කාණ්ඩ දෙකෙහිම අයිතමවල මිල ගණන් පිළිවෙළින්, සියයට 2.61කින් සහ සියයට 0.53කින් ඉහළ යෑම මේ සදහා හේතු විය. ඒ අනුව, 2021 නොවැම්බර් මාසයේ දී ආහාර කාණ්ඩය තුළ, එළවළු, සහල්, කිරි පිටි, ලොකු ළූණු, නැවුම් මත්ස්‍ය සහ කුකුල් මස් මිල ගණන් ඉහළ ගියේය. තවද, ආහාර නොවන කාණ්ඩය තුළ, ප්‍රධාන වශයෙන් ආපනශාලා සහ හෝටල් සහ මද්‍යසාර පාන වර්ග සහ දුම්කොළ යන උප කාණ්ඩවල අයිතමවල මිල ගණන් 2021 නොවැම්බර් මාසයේ දී ඉහළ ගියේය.

තවද, වාර්ෂික ලක්ෂ්‍යමය පදනම මත මූලික උද්ධමනය, 2021 ඔක්තෝබර් මාසයේ පැවති සියයට 7.2හි සිට 2021 නොවැම්බර් මාසයේ දී සියයට 8.8 දක්වා ඉහළ ගිය අතර, වාර්ෂික සාමාන්‍ය මූලික උද්ධමනය, 2021 ඔක්තෝබර් මාසයේ පැවති සියයට 4.6හි සිට 2021 නොවැම්බර් මාසයේ දී සියයට 5.0 දක්වා ඉහළ ගියේය.

මැඩගස්කරයේ පොලිස් සේවා කටයුතු බාර අමාත්‍යවරයා ඇතුළු පිරිසක් ගමන් කරමින් සිටි හෙලිකොප්ටරය මුහුදට කඩා වැටී ඇති බවත්, අනතුරින් දිවි ගලවා ගත් අමාත්‍යවරයා පැය 12 ක් තිස්සේ පිහිනමින් ගොඩබිමට පැමිණ දිවි ගලවා ගැනීමට සමත් වූ බවත් එරට පුවත් සේවා වාර්තා කරයි.

අනතුර සිදුවෙද්දී 57 හැවිරිදි අමාත්‍ය සර්ජ් ජෙල් සමඟ තවත් 64 දෙනකු හෙලිකොප්ටරයේ සිට ඇත.

හෙලිකොප්ටරය නියමුවන්ගේ පාලනයෙන් ගිලිහී ගිය අවස්ථාවේදී එය මුහුදට ඉහළින් පියාසර කරමින් තිබුණු අතර, ඇමැතිවරයා ඇතුළු කිහිප දෙනකු මුහුදට පැන ඇතැයි වාර්තා වේ.

හෙලිකොප්ටර් අනතුරට හේතුව මෙතෙක් අනාවරණය වී නැති අතර පොලිස්පති ස්‍ෆිසම්බ්‍රාටා මාධ්‍ය හමුවේ කියා සිටියේ හෙලිකොප්ටරයේ සුන්බුන් සොයා නාවික හමුදාව මෛහයුම් ආරම්භ කර ඇති බවය.

පැය 12 ක් තිස්සේ නොකඩවා පිහිනමින්, ගොඩබිමට ළං වූ අමාත්‍යවරයා කඩිනමින් රෝහල් ගත කෙරුණු බවත්, ඔහු දැඩි ලෙස විඩාවට පත් වී සිටි බවත් පොලිස්පතිවරයා පවසා තිබේ.

අනතුරින් මියගිය 22 දෙනකුගේ සිරුරු හමුවී ඇති බවත් සෙසු පිරිස තවමත් අතුරුදක් බවත් වෙරළාරක්ෂක නිලධාරීහු පවසති.

අමාත්‍ය සර්ජ් ජෙල් හිටපු පොලිස් නිලධාරියෙකි. ඔහු මැඩගස්කරයේ පොලිස් සේවා කටයුතු බාර අමාත්‍යවරයා බවට පත් වූයේ පසුගිය අගෝස්තුවේ සිදු කළ කැබිනට් මණ්ඩල සංශෝධනයකදීය.

'ඔහු දක්ෂ පිහිනුම් ශූරයෙක්. හොඳ නිරෝගී තැනැත්තෙක්. අවුරුදු 30 ක තරුණයෙක් වගේ මුහුදේ පිහිනලා පණ බේරා ගත්තා. ඒක සැබැවින්ම විස්මිතයි' යැයි පොලිස්පති ස්‍ෆිසම්බ්‍රාටා පවසා තිබේ.

ඇන්ටනානාරිවෝ (බීබීසී)

 

පහසුකම් සලසන ක්‍රම සම්බන්ධව අනතුරු සහ සීමා පවතී. එම අනතුරු සහ සීමා පිළිබඳ දැනුම මෙන්ම පූර්වාරක්ෂණ ක්‍රම පිළිබඳවද දැනුවත් වී තිබීම ඉතාමත් වැදගත්ය. දශක ගණනාවකට පෙර ආහාර පිසීමට දර ද පහන් දැල්වීමට තෙල් ද භාවිත කළෙමු. අද වන විට දර භාවිතය ක්‍රමයෙන් අඩුවී ද්‍රව පෙට්‍රෝලියම් (LPG) භාවිතයට නැඹුරු වී ඇති අතර ආලෝකය ලබාගැනීමට විදුලිය භාවිතා කරයි.

නවීන පහසුකම් භුක්ති විඳීමට මිනිසුන් දක්වන නැඹුරුව හේතුවෙන් අපට බොහෝ විට අමතක වී හෝ ඒවායේ අහිතකර ප්‍රතිවිපාක ගැන අවධානය යොමු නොකරයි. ආර්ථික හා පාරිසරික ගැටලු හැරුණු විට නවීන සුවපහසුව සලසන ක්‍රම මඟින් ආරක්ෂිත ගැටලු ඇති කරයි. සමහර විට ව්‍යාපාරික අංශය තම නිෂ්පාදන විකුණා වැඩි ලාභයක් උපයා ගැනීමට ආරක්ෂාව නොසලකා හරින අවස්ථාද අසන්නට දකින්නට ලැබේ. දූෂිත සංස්කෘතිය මගින්ද මෙවැනි පුරුදු දිරිමත් කරයි.

ඉවුම් පිහුම් සඳහා LP වායු භාවිතා කිරීමෙන් හටගන්නා ගිනි උවදුරු සහ පිපිරීම් මාලාවක් පිළිබඳව මෙම දිනවල වාර්තා වෙමින් පවතී.

ද්‍රව පෙට්‍රෝලියම් වායුව යනු කුමක්ද?

බොරතෙල් පිරිපහදු කිරීම මඟින් සාමාන්‍ය පරිසර තත්ත්ව වලදී ද්‍රව හෝ වායු හයිඩ්‍රෝකාබන (කාබන් සහ හයිඩ්‍රජන් අඩංගු සංයෝග) පරාසයක් නිස්සාරණය කරගත හැක. පෙට්‍රල්, භූමිතෙල් සහ ඩීසල් තාපාංක පිළිවෙළින් (95 – 150), (150 – 350) (175 – 375) සෙල්සියස් අංශක වේ. මේවා ස්වභාවික පරිසරයට වඩා බෙහෙවින් වැඩි උෂ්ණත්වයන්ය. මීට අමතරව කාමර උෂ්ණත්වයේදී වේගයෙන් වාෂ්ප වන පෙට්‍රෝලියම් ද්‍රවද තිබේ. මේවා ‘‘ඊතර’’ ලෙස හඳුන්වනු ලබයි.

තෙල් වලින් ලබාගත් වැදගත් වායුමය සංරචක දෙකක් වන්නේ බියුටේන් සහ ප්‍රොපේන්ය. සිසිල් කළ විට, මේවා සෙල්සියස් අංශක -2 සහ -42 උෂ්ණත්වයේදී දියර බවට හැරේ. මෙම වායු පීඩනය යෙදීමෙන් වැඩි උෂ්ණත්වවලදී ද්‍රවීකරණය කළ හැක. සෙල්සියස් අංශක 30 ක සාමාන්‍ය කාමර උෂ්ණත්වයේදී බියුටේන් සහ ප්‍රොපේන් ආසන්න වශයෙන් වායුගෝල 2 සහ 10 ක වායුගෝලීය පීඩනයකදී ද්‍රවීකරණය කළ හැක.

මේවා ආසන්න වශයෙන් කාමර උෂ්ණත්වයේදී දියර ආකාරයෙන් බියුටේන් සහ ප්‍රොපේන් ගබඩා කිරීමට අවශ්‍ය අවම පීඩන වේ. එහෙත් සම්පූර්ණ සිලින්ඩරයක ප්‍රොපේන් සහ බියුටේන් විශාල ප්‍රතිශතයක් ද්‍රවයක් ලෙස පවතී. ඉතිරි සියයට 10 – 20 වාෂ්ප ආකාරයෙන් පවතී. එබැවින් සිලින්ඩර කපාටය විවෘත වන විට වායූ (වාෂ්ප) පිටතට තල්ලු වන අතර ඇතුළත ඇති දියර සෙමෙන් උණු වීමට පටන් ගනී. කපාටය වැසීමෙන් පසු ද්‍රව සහ වායු යන දෙකම ඇතුළත පවතින තාක් මුල් පීඩනය නැවත ලබාගන්නා අතර වායුවේ උෂ්ණත්වය හා සංයුතිය මත පීඩනයේ අගය රඳා පවතී.

ද්‍රව පෙට්‍රෝලියම් ආශ්‍රිත පිපුරුම් සහ විද්‍යාත්මක මතය

මේ අතර LP වායුවේ පෙන්ටේන් කුඩා ප්‍රතිශතයක් (සෙල්සියස් අංශක 36 තාපාංකයක් සහිත හයිඩ්‍රොකාබනයක්) ද අඩංගු වේ. මෙම ද්‍රව්‍යයට බියුටේන් හෝ ප්‍රොපේන් මෙන් කිසිදු හානියක් සිදුකළ නොහැක. එහි ඉහළ තාපාංකය තිබියදීත්, එය උණුසුම් උෂ්ණත්වවලදී බියුටේන් සහ ප්‍රොපේන් සමඟ රැගෙන යයි.

වාණිජ LP වල වායුගෝල 7 – 15 අනුපිළිවෙළෙහි පීඩනයට සම්පීඩිත විවිධ ප්‍රමාණවලින් බියුටේන් සහ ප්‍රොපේන් මිශ්‍රණ අඩංගු වේ. ප්‍රොපේන් ප්‍රතිශතය විශාල වන විට වැඩි ගබඩා පීඩනයක් අවශ්‍ය වේ. නැවතත් ප්‍රොපේන් ප්‍රතිශතය වැඩිවූ විට සිලින්ඩරය තුළ වාෂ්ප පීඩනය උෂ්ණත්වය සමඟ වේගයෙන් වැඩිවේ. පහත ඉදිරිපත් කර ඇති ප්‍රස්ථාරය (www.engineeringtoolbox.com වෙතින් ලබාගෙන ඇත) LPG හි ප්‍රොපේන්/බියුටේන් අනුපාතය සමඟ පීඩනය වෙනස් වන ආකාරය පෙන්නුම් කරයි (එහි සිරස් අක්ෂයේ දැක්වෙන සංඛ්‍යා සාමාන්‍ය වායුගෝලීය පීඩනයේ ඒකක වලින් මනිනු ලබන පීඩනය ආසන්න වශයෙන් වේ)

සාමාන්‍යයෙන් උණුසුම් නිවර්තන කලාපවල භාවිතා කරන LP වායු වල බියුටේන් සියයට 70 – 80 ක් සහ ප්‍රොපේන් සියයට 30 – 20 ක් අඩංගු වේ. එවැනි තත්ත්වයක් යටතේ බියුටේන් වාෂ්ප වීම ඉතා මන්දගාමී වන නිසා ශීත දේශගුණයක් ඇති රටවල් ප්‍රොපේන් වැඩි ප්‍රතිශතයක් අඩංගු LPG භාවිතා කරනු ලබයි. උණුසුම් පරිසරයන් තුළ, බහාලුම් තුළ ඉහළ පීඩනයක් ඇතිවීම වැළැක්වීම සඳහා බියුටේන් විශාල ප්‍රතිශතයක් සහිත LP වායු වඩාත් සුදුසු වේ.

පවතින ප්‍රොපේන් ප්‍රමාණය කුමක් වුවත් පීඩනයට ඔරොත්තු දීමට ගෑස් සිලින්ඩර ප්‍රමාණවත් තරම් ශක්තිමත් බව පැවසිය යුතුමය.

ගින්නකින් රත් වුවහොත් මිස ඒවා කැඩී බිඳී නොයනු ඇත. කෙසේ වෙතත්, පීඩනය වැඩි නම් සිලින්ඩරයේ හෝ දාහකයේ දෝෂ සහිත කපාට හරහා, ගෑස් කාන්දු විය හැක. සමහර විට පීඩනය අධික වන විට ගෑස් රැගෙන යන නළ සඳහා සම්බන්ධතා කාන්දු වීම හෝ සම්පූර්ණයෙන්ම ගැලවීමක් විය හැක. LP වායු වාතයට වඩා බරින් යුක්ත වන අතර, සංවෘත අවකාශයක ගෑස් කාන්දු වුවහොත් එය පොළවේ සිට පැතිරීමට පටන් ගනී. එවැනි තත්ත්වයකදී සුළු ගිනි පුපුරකින් පිපිරිමක් හා ගින්නක් ඇති කරයි.

වාතයේ LP වායු ප්‍රතිශතය සියයට 4 – 6 ඉක්මවන විට මිශ්‍රණය පුපුරා යා හැක. බොහෝ විට මෙය සිදුවන්නේ යමකු දාහකය දැල්වීමට උත්සාහ කරන විටය. විදුලිය ක්‍රියාත්මක කිරීමේදී හෝ ක්‍රියා විරහිත කිරීමේදී ඇතිවන පුළිඟු නිසා සමුච්චිත වායුව දැල්විය හැකිය. එපමණක් නොව, ස්විචයක් තුළ ඇති ලෝහමය සම්බන්ධතා විවෘත කිරීම හෝ වසා දැමීම සෑම විටම ගිනි පුපුරක් ඇති කරයි. මෙවලම් සමඟ වැඩ කිරීමේදී ඇති වන ඝර්ෂණය සහ ස්ථිතික විද්‍යුත්කරණය හේතුවෙන් ඇති වන ගිනි පුපුරු LP වායු මිශ්‍රණයක් දැල්වීමට ප්‍රමාණවත් වේ. බියුටේන් හා සසඳන විට ප්‍රොපේන් ගිනි ගැනීම් වැඩිය.

පූර්වාරක්ෂිත ක්‍රම

ඉවුම් පිහුම් සඳහා LP වායු භාවිතා කිරීමේදී සිදුවන බොහෝ අනතුරුවලට හේතුව ගෑස් කාන්දු වීමයි. එබැවින් හොඳ පූර්වාරක්ෂාවක් වනුයේ කාන්දු වන වායුව හඳුනාගැනීමේ ක්‍රමයක් තිබීමයි. නාසය යනු මිනිසුන්ට සහ සතුන්ට ඇති වඩාත්ම සංවේදී රසායනික අනාවරකයයි. සමහර රසායනික ද්‍රව්‍ය අවම ප්‍රමාණයකින් ගඳ සුවඳ දැනිය හැක. පිරිසුදු ස්වරූපයෙන් ප්‍රොපේන් සහ බියුටේන් ගන්ධ රහිතය. වාණිජ LPG වල ඇරෝමැටික අපද්‍රව්‍ය පැවතීම හේතුවෙන් දුර්වල සුවඳක් ඇත. එහෙත් මෙය ගෑස් කාන්දුවක් දැකීමට තරම් ශක්තිමත් නොවේ. එබැවින් ගන්ධයක් LPG වලට ඇතුළත් වේ. ගන්ධය හඳුන්වා දී ඇත්තේ මෙතිල් සල්ෆයිඩ්, තයෝල් සහ මර්කැප්ටන් වැනි සල්ෆර් සංයෝග වේ. මෙම සංයෝග ලූනු ලීක්ස්, දූරියන් හෝ මැල්ල කොළ වැනි සුවඳකින් යුක්තය.

බොහෝ රටවල LPG වලට ගන්ධයක් එකතු කිරීම ගෑස් සැපයුම්කරුවන්ට නොසලකා හැරිය නොහැකි නීතිමය අවශ්‍යතාවකි. පිටවන වායුවේ ශබ්දයෙන් ගෑස් කාන්දුවක් හඳුනාගත හැකි යැයි කීම විහිළුවකි. එවැනි ශබ්ද ඇසෙන්නේ සුවිශේෂී ලෙස ඉහළ වේගයකින් ගෑස් කාන්දු වන විට පමණි. ඩිටර්ජන්ට් ද්‍රාවණයක් ආලේප කිරීමෙන් සිලින්ඩර කපාටයේ සහ සම්බන්ධතාවල කාන්දුවීම් හඳුනාගත හැකිය. බුබුලු ඇතිවීම ගෑස් කාන්දු වීමේ සලකුණකි.

සරල ආරක්ෂණ ක්‍රම මගින් LPG ආහාර පිසීමේදී සිදුවන අනතුරු බොහෝ සෙයින් අඩුකර ගත හැක. කාන්දු වීමකදී ගෑස් එකතු වීම වළක්වා ගැනීම සඳහා හොඳින් වාතාශ්‍රය ඇති ස්ථානයක සෑම විටම සිලින්ඩරය ස්ථාපනය කළ යුතුය. පිසීමෙන් පසු සිලින්ඩරයෙන් නියාමකය විසන්ධි කළයුතුය. දාහක දිගු කාලයක් තිස්සේ අවධානයෙන් තොරව තැබීම නොකළ යුතු ක්‍රියාවකි. නළ සම්බන්ධතා වල තද බව නිතර නිතර පරික්ෂාවට ලක් කිරීම අවශ්‍යය. කුකර් පිරිසුදුව තබා නොගන්නේ නම් අළු සහ කාබන් දාහක මගින් කපාට අවහිර කර අක්‍රිය වීමට හේතු විය හැක. එසේම ආහාර වල අඩංගු ලුණු මඟින් දාහක සහ කපාට විඛාදනයට ලක්කරයි.

ගෑස් කාන්දුවක සලකුණක් තිබේ නම්, දාහක දැල්වීම සිදු නොකළ යුතු අතර සිලින්ඩරයෙන් නියාමකය පරෙස්සමින් විසන්ධි කළ යුතුය. දොරවල් සහ ජනෙල් විවෘත කරන්න, විදුලිය ක්‍රියාත්මක කිරීමෙන් හෝ විසන්ධි කිරීමෙන් වළකින්න. ටික වේලාවක් පරිශ්‍රයෙන් ඈත්ව සිටින්න. ගෑස් සිලින්ඩරය හෝ දාහකයට ගෑස් ලබාදෙන නළ අසල ගින්නක් තිබේ නම්, නියාමකය විසන්ධි කිරීමට හෝ දාහකය වසා දැමීමට උත්සාහ නොකළ යුතුය. වහාම එම ස්ථානයෙන් ඉවත්වී ගිනි නිවන දෙපාර්තමේන්තුවට දන්වන්න.

සම්මත LP ගෑස් සිලින්ඩර්, කුකර් සහ උපාංග සැලසුම් කර ඇත්තේ ගෑස් සංයුතියේ වෙනස්වීම් (ප්‍රොපේන්/ බියුටේන් අනුපාතය) හෝ උෂ්ණත්වයේ වෙනස්වීම් හේතුවෙන් පීඩන වෙනස්කම් ඇති වුවද, ගෑස් කාන්දු වීම වැළැක්වීම සඳහාය. කෙසේ වෙතත්, අදාල උපාංග ප්‍රමිතියෙන් තොර හෝ දෝෂ සහිත නම් ගෑස් කාන්දුවීම් සිදුවිය හැකි අතර එයින් බරපතළ අනතුරු ඇති විය හැක.

LPG කුකර් ආශ්‍රිත අනතුරු අවම කිරීම සඳහා සාමාන්‍ය ජනතාව විමසිලිමත් විය යුතු අතර පූර්වාරක්ෂණ ක්‍රම අනුගමනය කළ යුතුය. ගන්ධ රහිත LPG සන්නාම සහ ප්‍රමිතියෙන් තොර කුකර් සහ උපාංග අලෙවිය නියාමනය කළ යුතුය. ගෑස් සංයුතියේ කිසියම් වෙනස්කමක් සිදු කළේ නම් අදාල ආයතන වලට දැනුම් දිය යුතුය. නිසි පූර්වාරක්ෂාව අනුගමනය කිරීමෙන් සහ පාරිභෝගික ආරක්ෂණ නීති අනුගමනය කිරීමෙන් LPG ආරක්ෂිතව කළමනාකරණය කළ හැකිය.

මෙම ලේඛකයා ශ්‍රී ලංකාවේ ජාතික මූලික අධ්‍යයන ආයතනයට අනුයුක්ත පර්​යේෂණ මහාචාර්යවරයකු සහ විද්‍යාඥයකු ලෙස කටයුතු කරයි.

මහාචාර්ය  ජී.ආර්.ඒ. කුමාර විසිනි.

ගෑස් ලිප් පුපුරා යාම් හා ගිනි ගැනීමේ සිද්ධීන්ට මූලික හේතුව ගෑස්වල සංයුතිය වෙනස් කිරීම බව, ගෑස් සිලින්ඩර් ආශ්‍රිත පුපරා යාම් හා ගිනි ගැනීම් පිළිබඳ විමර්ශනය කිරීමට හා විසඳුම් යෝජනා ඉදිරිපත් කිරීමට පත් කළ තාක්ෂණ කමිටුව හෙළි කර තිබේ.

ගෑස් සංයුතිය වෙනස් කර ඇත්තේ නිසි නියාමනයකින් තොරව බව ද තමන් කළ විමර්ශනයේ දී හෙළි වී යැයි එම කමිටුවේ සභාපති මහාචාර්ය ශාන්ත වල්පොල මහතා රජයේ ප්‍රවෘත්ති දෙපාර්තමේන්තුවේ දී ප්‍රකාශ කළේය.

ගෑස් නිෂ්පාදනය නියාමනය සඳහා මහජන උපයෝගිතා කොමිසම වැනි ආයතනයක් වහාම ප්‍රතිස්ථාපනය විය යුතු බවට ද කමිටුව නිර්දේශ කළ බව මහාචාර්ය වල්පොල මහතා කීය.

ගෑස් සංයුතිය වෙනස් ප්‍රොපේන් හා බියුටේන් මෙන්ම ගෘහස්ත ගෑස් සඳහා භාවිතා කෙරෙන අනෙක් සංයෝග ද වෙන වෙනම ආනයනය කළ විට ඒවා මිශ්‍ර කර ගැනීම සඳහා ලිට්රෝ ගෑස් සමාගමට ස්ථානිය පහසුකම් නැති බවත් ඒවා සකස් කර ගත යුතු බවත් එම විද්වත් කමිටුව නිර්දේශ කර ඇත.

එමෙන්ම රජයේ සමාගම වන ලිට්රෝ ගෑස් සමාගම් පරිශ්‍රය තුළ තත්ත්ව ආරක්ෂණ රසායනාගාරයක් වහා ආරම්භ කළ යුතු බවත් එය කාර්මික තාක්ෂණ ආයතනයේ අධික්ෂණය යටතේ පවත්වාගෙන යායුතු බවටත් තම කමිටුව නිර්දේශ කළ බව ද මහාචාර්ය වල්පොල කියා සිටියේය.

වීනීතා එම් ගමගේ

 

විදෙස් ණය ගෙවීමට ශ්‍රී ලංකාවට ඇති හැකියාව ගැන ෆිච් රේටින්ස් "Fitch Ratings" අනතුරු අඟවයි.

ඒ අනුව "ෆිච් රේටින්ස්" විසින් ශ්‍රී ලංකාවේ Long-Term Foreign-Currency Issuer Default Rating (IDR) ශ්‍රේණිගත කිරීම 'CCC' සිට 'CC' දක්වා පහත දමා ඇත.

මේ සම්බන්ධයෙන් දීර්ඝ නිවේදනයක් නිකුත් කරමින් "ෆිච් රේටින්ස්" පවසන්නේ ඉහළ විදේශ ණය ගෙවීම් සහ සීමිත මූල්‍ය ගලා ඒම් හමුවේ ශ්‍රී ලංකාවේ බාහිර ද්‍රවශීලතා තත්ත්වය අයහපත් අතට හැරෙමින් පවතින බවයි. 

ඒ අනුව ඉදිරි මාසවල දී ණය පැහැර හැරීමක වැඩි සම්භාවිතාවක් කෙරෙහි "ෆිච් රේටින්ස්" හි අවධානය යොමුව ඇති බවද අවධාරණය කර තිබේ.

මේ අතර "ෆිච් රේටින්ස්" පවසන්නේ සිය අවසන් සමාලෝචනයේ දී බලාපොරොත්තු වූවාටත් වඩා වැඩි වේගයකින් ශ්‍රී ලංකාවේ විදේශ විනිමය සංචිත පහත වැටී ඇති බවය. 

විදේශ විනිමය සංචිතය අගෝස්තු මාසයේ සිට ඩොලර් බිලියන 2කින් පමණ අඩු වී ඇති අතර එය නොවැම්බර් අග වනවිට ඩොලර් බිලියන 1.6 ක් දක්වා පහත වැටී ඇත්තේ මාසයකටත් වඩා අඩු බාහිර ගෙවීම්වලට ප්‍රමාණවත්භාවයක් පිළිබිඹු කරමිනි.

"2022 සහ 2023 දී නව බාහිර මූල්‍ය ප්‍රභවයන් නොමැති විට රජයට සිය විදෙස් ණය ගෙවීම් සපුරාලීම දුෂ්කර වනු ඇතැයි අපි විශ්වාස කරමු. මෙම ණය ගෙවීම් 2022 ජනවාරි මාසයේ දී ගෙවිය යුතු ඩොලර් මිලියන 500 ක ජාත්‍යන්තර ස්වෛරී බැඳුම්කර දෙකක් සහ 2022 ජූලි මාසයේ දී ඩොලර් බිලියන 1ක ජාත්‍යන්තර ස්වෛරී බැඳුම්කර දෙකක් ඇතුළත් වේ. ඒ අනුව 2022 වසරේ දී ඩොලර් බිලියන 6.9 ක පොලී ද ඇතුළුව විදෙස් ණය ප්‍රමාණයක් පියවීමට ශ්‍රී ලංකාවට සිදුව ඇත. මෙය නොවැම්බර් අවසන් වනවිට පැවති විදෙස් සංචිතය මෙන් 430% ක් පමණ වේ. 2022 සිට 2026 දක්වා ශ්‍රී ලංකාවේ සම්ච්ඡිත විදෙස් ණය සේවාකරණය ‌ඩොලර් බිලියන 26කි.", යනුවෙන් "ෆිච් රේටින්ස්" වැඩිදුරටත් මෙහිදී පෙන්වා දී ඇත.

ලෝක වෙළෙඳපොළේ රත්තරන් මිල මාස දෙකකට ආසන්න කාලයකට පසුව ඉහළතම මිල වාර්තා වෙමින් මෙම සතියේදී සියයට 1.4 කින් ඉහළ ගොස් තිබේ.

ලෝක රත්තරන් වෙළෙඳපොලේ අද රත්තරන් අවුන්සයක් ඩොලර් 1,807 කට අළෙවි විය.

හෙට්ටිවීදිය ප්‍රමුඛ ශ්‍රී ලංකා රත්තරන් වෙළෙඳපොළේ කැරට් කැරට් 22 රත්තරන් පවුමක් රුපියල් 107,250 කට සහ කැරට් 24 රත්තරන් පවුමක් රුපියල් 117, 000 කට අද අළෙවි විය.

ශ්‍රී ලංකාව තුළ මේ මස මුල කැරට් 22 රත්තරන් පවුමක් රුපියල් 107, 800 කට සහ කැරට් 24 රත්තරන් පවුමක් රුපියල් 116, 500 අළෙවි වූ අතර හෙට්ටිවීදිය රත්තරන් ව්‍යාපාරිකයන් පවසන්නේ ලෝක වෙළෙඳපොළේ රත්තරන් මිලේ වර්තමාන උච්ඡාවචනය සැළකිය නොහැකි තරම් බවයි.

යොහාන් භාසුර

 

විදේශවල සිටින ශ්‍රී ලාංකිකයන්ට උප්පැන්න, විවාහ සහ මරණ සහතික ලබාගැනීම ඇතුළු රෙජිස්ටාර් ජනරාල් දෙපාර්තමේන්තුව සපයන සේවාවන් මාර්ගත ක්‍රමයට ලබාගත හැකි බව එම දෙපාර්තමේන්තුව පවසයි.

විදේශවල සිටින ශ්‍රී ලාංකිකයන්ට රෙජිස්ටාර් ජනරාල් දෙපාර්තමේන්තුවේ වෙබ් අඩවිය වන www.rgd.gov.lk වෙබ් අඩවියට පිවිස අදාල ලේඛණ ඉල්ලුම් කළ හැකි බවත් එම දෙපාර්තමේන්තුව එම ලේඛණ ශ්‍රී ලංකාව තුළ පමණක් බෙදාහරින බවත් වැඩි දුරටත් පැවසීය.

යොහාන් භාසුර.

සූර්යයා එසේත් නැතිනම් හිරු ගවේෂණයට යැවූ රෝබෝ යානය, හිරුගේ ඉහළ රැස් වළල්ල අතරින් ගමන් කරමින්, දත්ත රැස් කළ ඇතැයි ඇමෙරිකාවේ නාසා ආයතනය නිකුත් කළ නිවේදනයක දැක්වෙයි.

‘පාකර් සෝලර් ප්‍රෝබ්’ යන නමින් නම් කළ මෙම රොබෝ යානය, මිනිසා විසින් හිරු ගවේෂණයට යැවූ පළමු ගවේෂණය යානයයි.

‘පාකර් සෝලර් ප්‍රෝබ්’ හිරුගේ චුම්බක ක්ෂේත්‍රය අධ්‍යයනය කරමින්, හිරුගේ අංශු සාම්පල එක්රැස් කළ බව නාසා ආයතනය කියයි. යානය නිපදවා ඇත්තේ හිරුගේ අධික තාපයට ඔරොත්තු දෙන අන්දමින් විශේෂිත ක්‍රමයකටය.

රොබෝ යානය, හිරුගේ ඉහළ රැස් වළල්ල අතරින් ගමන් කරමින් දත්ත රැස් කර තිබෙන්නේ පසුගිය අප්‍රේල් 28 වැනිදාය. එම දත්ත විශ්ලේෂණය කරමින් ඒ බව තහවුරු කිරීමට නාසා විද්‍යාඥයන්ට මාස කීපයක් ගතවිය. ඒ අනුව, ‘පාකර් සෝලර් ප්‍රෝබ්’ රොබෝ යානයේ වික්‍රමය ලොවට අනාවරණය සිදු කෙරුණේ පසුව විශේෂ මාධ්‍ය හමුවක් පවත්වමිණි.

නාසා ආයතනය ‘පාකර් සෝලර් ප්‍රෝබ්’ යානය පෘථිවියෙන් පිටත් කර හිරු වෙත යැවීම සිදුවූයේ 2018 දීය. එය හිරු වටා යමින් සෙමින් සෙමින් හිරුට ළං වීම සිදුවිය. යානය ගමන් කරන්නේ පැයට කිලෝ මීටර් 6,92,000 ප්‍රබල වේගයකිනි. ‘පාකර් සෝලර් ප්‍රෝබ්’ යානය නිපදවීමට වැය වී ඇති මුදල ඇමෙරිකන් ඩොලර් බිලියන 1.5 කි.

(රොයිටර්)

කරුණු හයේ ව්‍යාපාරය හෙවත් නිදහසේ ප්‍රඥප්තිය

‘මිනිසෙකු වශයෙන්, මනුෂ්‍ය වර්ගයා ගැන සැලකිලිමත් වන දේ මට අදාළ වේ. බෙංගාල ජාතිකයෙකු ලෙස මම බෙංගාලයන් සම්බන්ධ සෑම දෙයකටම ගැඹුරින් සම්බන්ධ වෙමි. මෙම ස්ථිර මැදිහත්වීම ආදරයෙන් උපත ලබා සදාකාලීක  ආදරයෙන්  පෝෂණය වේ., එය මගේ දේශපාලනයට සහ මගේ පැවැත්මට අර්ථයක් ලබා දෙයි.’ - බංගබන්ධු ෂෙයික් මුජිබර් රහ්මාන්

(3.5. 1973)

නිදහස් රාජ්‍යය පරිපාලනයක් උදෙසා පාකිස්තානයට එරෙහිව බංගලාදේශයේ විමුක්තිකාමීන් විසින් සිදුකළ සන්නද්ධ අරගලය ජයග්‍රහණය කොට මේ වසරේ දෙසැම්බර් 16 වන දිනට එනම් අද දිනට වසර පනහක් සම්පූර්ණ වේ. ගෙවුණු වසර පනහක කාලය තුළ බංගලාදේශයේ ගමන් මග ගැන විමසා බැලීම කාලෝචිතය.  මන්ද, දේශපාලන සහ හමුදා කුමන්ත්‍රණවලින් පමණක් නොව ස්වභාවික විපත්වලින් ගහන වූ අස්ථාවර භූමියක නැගෙනහිර පකිස්තානය  1971 දී බංග්ලාදේශය නමින් ස්වාධීන රාජ්‍යයක් බවට පත් වීම දකුණු ආසියානු දේශපාලනයේ තීරණාත්මක සිදුවීමක් නිසාය. 1971 වන විට මිලියන 75ක් ජීවත් වූ බංගලාදේශයේ ඒක පුද්ගල ආදායම ඇමෙරිකානු ඩොලර් 100 ට වඩා අඩු විය නමුත් මේවන විට එය ඩොලර 2140 ට ආසන්නය. 1990 වන විට රටේ මුළු ජනගහනයෙන් 56%ක් අන්ත දුගීභාවයෙන් පෙළුණු අතර එය 2018 වන විට 21.8% දක්වා අඩුකොට ඇත. දේශීය මුදල් ඒකකය වන ටකා සැලකිය යුතු මට්ටමිකින් ස්ථාවර වී ඇති අතර මූල්‍යය වාර්තාවලට අනුව බංගලාදේශයේ විදේශ විනිමය සංචිතය 2021 ඔක්තෝබර් මාසය වන විට ඩොලර් මිලියන 46459.30 දක්වා වර්ධනය වී ඇත. බංගලාදේශයේ භූමි ප්‍රමාණයෙන් 80%ක් මුහුදු මට්ටමේ සිට මීටර් 12ට වඩා අඩුය. එක් ඇස්තමේන්තුවකට අනුව, එරට වර්තමාන ජනගහන වර්ධනයේ සහ ගෝලීය උෂ්ණත්වය ඉහළ යාමේ මට්ටම අනුව, 2050 වන විට බංග්ලාදේශයේ මිලියන 300ක ජනතාවකට ජීවත් වීම සඳහා ඇති භූමි ප්‍රදේශයේ විශාලත්වය වන්නේ වර්ග කිලෝමීටර් 120,000කි. ඒ අනුව රටේ ජන ඝනත්වය වර්ග කිලෝමීටරයකට පුද්ගලයන් 2,500ක් හෝ ඊට වඩා වැනි වනු ඇත. මේ අතර ගංගා ඉවුරු ඛාදනය නිසා බංගලාදේශයේ වාර්ෂිකව 100,000 කට වැඩි පිරිසක් අවතැන් වන බව ඇතැම් ඇස්තමේන්තු පෙන්වා දී ඇත. මුහුණ දෙමින් සිටින අභියෝග හමුවේ රටේ සංවර්ධන ඉලක්ක මුදුන් පමුණුවා ගැනීම සඳහා ක්‍රියකාරී සැලසුම් ගණනාවක් සකස් කොට තිබේ. පසුගියදා පවති එක්සත් ජාතීන්ගේ COP26 දේශගුණික සමුළුවේදී එලි දැක්වූ මුජිබ් දේශගුණික සෞභාග්‍ය සැලැස්මට අනුව රටේ බලශක්ති ඉල්ලුමෙන් 40% ක් 2041 වන විට පුනර්ජනනීය ප්‍රභවයන්ගෙන් සහතික කිරීමට සැලසුම් කොට ඇත.  ගෙවී ගිය වසර 50ක කාලය පුරා ඇතැම් රාජ්‍යයන්  බංකොලොත් විය, තවත් රාජ්‍යයන් සංවර්ධන ඉලක්ක කරා ගමන් කළේය.  පකිස්තාන මධ්‍යම ආණ්ඩුවේ උග්‍ර මර්දනයට මුහුණ දෙමින් තිබු භූමිය පසු කාලයකදී ලෝකයේ වේගයෙන්ම වර්ධනය වන ආර්ථිකයකට හිමිකම් කියන රාජ්‍යයක් බවට පත්වූයේ කෙසේද. මිලියන තුනක පමණ ජනතාවක් ඝාතනය වී තවත් මිලියන දහයක් පමණ සරණාගතයින් බවට පත්කළ කුරුරු යුද්ධයකින් පසු ගෙවී ගිය වසර පනහක කාලය තුළදී සිදුවූ බංග්ලාදේශයේ රූපාන්තරණය ගැන සිදුකෙරෙන විමසා බැලීම වැදගත් වන්නේ ඒ  නිසාය.  

නැගෙනහිර පාකිස්තානය පුරා කාලයක් තිස්සේ මතුවෙමින් තිබු විරෝධය කෙසේ හෝ යටපත් කොට තම බලය රැක ගැනීම පාකිස්තාන ආණ්ඩුවේ අරමුණ විය.   පාකිස්තාන හමුදාව විසින් 1970 දෙසැම්බර් මාසයේදී සර්ච්ලයිට් මෙහෙයුම  රහසිගතව ආරම්භ කරනු ලැබුවේ ඊට ප්‍රතිචාර දැක්වීම සඳහාය. ඒ වන විටත් මුජිබුර් රහ්මාන්, තාජුදීන් අහමඩ්, ජෙනරාල් එම්.ඒ.ජී. ඔස්මානි, අබ්දුල් කාදර් සිද්දික්,ෂියායුර් රහ්මාන්, ඇතුළු විශාල පිරිසක් තම දේශපාලන අයිතිවාසිකම් වෙනුවෙන් අරගල ආරම්භ කොට වසර ගණනාවක්  ගත වී ගොස්ය.  ඇතැමෙකු සිරගත කොටය. තවත් අයෙකු ගරිල්ලන් සමග වනගත වී සටන් කරමින් සිටියෝය.

නැගෙනහිර පාකිස්තානයට වඩාත් පුළුල් වූ ස්වයං පාලනයක් ඉල්ලා සිටි ෂෙයික් මුජිබර් රහ්මාන් විසින් මෙහෙයවන ලද කරුණු හයේ ව්‍යාපාරය ව්‍යාපාරය විසින් ආණ්ඩුවට එරෙහිව ජනතාව විශාල වශයෙන් ඒකරාශිකොට තිබුණි. රෙහ්මාන් සෝබාන්, නුරුල් ඉස්ලාම් සහ කයිරුල් කබීර් ප්‍රමුඛ බුද්ධිමතුන්  විසින්  කෙටුම්පත් කොට අවාමි ලීගය විසින් සමාජගත කරනු ලැබූ මූලික කරණු හය  බංගලාදේශ ජාතිකයන්ට නව බලාපොරොත්තුවක් ලබා දීමට සමත් විය. එය නිදහසේ ප්‍රඥප්තිය  ලෙස හැඳින්වූයේ ඒ නිසාය.

ඊට මාස කිහිපයකට පෙර සෝවියට් දේශයේ මැදිහත්වීමෙන් ඉන්දු-පකිස්තාන යුද්ධය අවසන් වීමෙන් පසු දෙපාර්ශවය අතර සාමය පවත්වා ගැනීම සඳහා ටස්කෙන්ට් ගිවිසුම 1965 දී අත්සන් කරනු ලැබීය. ගිවිසුමේ කරුණු නොසලකා හරිමින් පාකිස්තාන ආණ්ඩුව නැගෙනහිර පාකිස්තානයේ ජනතාවගේ ආර්ථික විෂමතාවයන් සහ දුක්ගැනවිලි වලට දැක්වුයේ උදාසීන ප්‍රතිචාරයකි. එම තත්වය  මධ්‍යම ආණ්ඩුවට එරෙහිව නැගෙනහිර පාකිස්තානය පුරා ව්‍යාප්ත වී තිබු සමාජ කණ්ඩායම් සහ දේශපාලන ව්‍යාපාර වලට උත්ප්‍රේරකයක් විය. 1955 පෙබරවාරි මාසයේදී ස්වාධීනත්වය උදෙසා වූ ප්‍රධාන කඩඉමක් පසු කිරීමට එම කණඩායම් වලට හැකි වූ එහි ප්‍රතිඵලයක් ලෙසය. එහිදී ඉදිරිපත් කළ කරුණු හය ගැන අවදානය යොමු කිරීම ඔවුන්ගේ දේශපාලන ව්‍යාපාරෙය් ප්‍රධාන අරමුණු ගැන අවබෝධ කර ගැනීම සඳහා ඉතා වැදගත්ය. බංගලාදේශයේ අනාගතය තීන්දු කළ එක් ප්‍රධාන ලියවිල්ලක් වන්නේ මෙයයි.

01. ලාහෝර් යෝජනා ප්‍රකාරව සන්දීය ආණ්ඩුක්‍රමයක් හඳුනවා දී, ඒ සඳහා නියෝජිතයින් පත්කිරීමට සර්වජන ඡන්ද බලය  ව්‍යවස්ථානුකූලව ලබා දිය යුතුය

02. මාධ්‍යම ෆෙඩරල් රජය ආරක්ෂක සහ විදේශ කටයුතු සම්බන්ධයෙන් පමණක් කටයුතු කළ යුතු අතර අනෙකුත් සියලුම අවශේෂ විෂයන් ෆෙඩරල් ප්‍රාන්ත ආණ්ඩුව වෙත පැවරිය යුතුය.

03. නිදහසේ හුවමාරු කළ හැකි මුදල් වර්ග දෙකක් හඳුන්වාදිය යුතුය. එය කළ නොහැකිනම් බටහිර සිට නැගෙනහිරට ප්‍රාග්ධනය සංසරණය වීම ව්‍යවස්ථානුකූලව නවත්වා සමස්ත රටටම තනි මුදල් ඒකකයක් හඳුන්වා දිය යුතුය.   තවද, වෙනම බැංකු සංචිතයක් ස්ථාපිත කළ යුතු අතර නැගෙනහිර පකිස්තානය සඳහා වෙනම මූල්‍ය හා මූල්‍ය ප්‍රතිපත්තියක් අනුගමනය කළ යුතුය.

04. බදු අයකිරීමේ සහ ආදායම් එකතු කිරීමේ බලය සන්ධීය ඒකක (ෆෙඩරේටින් යුනිට්ස්) වෙත පැවරිය යුතු නමුත් මධ්‍යම ආණ්ඩුවට ඒ සම්බන්ධයෙන් බලයක් නොතිබිය යුතුය. නමුත් මධ්‍යම ආණ්ඩුවේ ( ෆෙඩරේෂන්) වියදම් පියවා ගැනීම සඳහා රාජ්‍ය බදුවලින් කොටසක් හිමිවිය යුතුය.

05. විදේශ විනිමය ඉපැයීම් සඳහා මධ්‍යම ආණ්ඩුවට සහ ෆෙඩරල් ප්‍රාන්ත ආණ්ඩුවට වෙනම ගිණුම් දෙකක් තිබිය යුතුය. ෆෙඩරල් රජයේ විදේශ විනිමය අවශ්‍යතා  මධ්‍යම සහ ප්‍රාන්ත ආණ්ඩු දෙක සමානව හෝ නියම කළ යුතු අනුපාතයකින් සපුරාලිය යුතුය; දේශීය නිෂ්පාදන මධ්‍යම ආණ්ඩුව සහ ප්‍රාන්තය අතර තීරුබදු රහිතව හුවමාරු කළ යුතු අතර විදේශ රටවල් සමඟ වෙළඳ සබඳතා ඇති කර ගැනීමට ව්‍යවස්ථානූකූල බලයක් ප්‍රාන්ත ආණ්ඩුවට ලබාදිය යුතුය.

06. නැගෙනහිර පකිස්තානයට වෙනම උපහමුදාවක් (මිලීෂියාවක්) හෝ පැරාමිලිටරි බළකායක් තිබිය යුතුය.

1966 පෙබරවාරි මාසයේදී එළිදක්වා මාර්තු මාසයේදී රට පුරා බෙදා හරිනු ලැබූ මෙම කරුණු හයට ඉහළ ප්‍රතිචාරයක් ලැබුණි. එසේම බලාපොරොත්තු වූ පරිදිම එය පාකිස්තාන ආණ්ඩුවේ වෛරයට පාත්‍ර විය. තමන්ගෙන් වෙන්වීමට මාන බලන නැගෙනහිර පාකිස්තානය කෙසේ හෝ රඳවා ගැනීම සඳහා අවශ්‍ය පියවර ගැනීමට අයුබ් ඛාන්ගේ ආණ්ඩුව තීන්දු කළේය. 1958 දී හමුදා කුමන්ත්‍රණයක් ඔස්සේ බලයේ සිටි ඉස්කන්දර් මිර්සා බලයෙන් පහකොට රටේ බලය අල්ලාගෙන පාකිස්තානයේ දෙවන ජනාධිපතිවරයා බවට පත්වූ ෆීල්ඩ් මාර්ෂල් අයුබ් ඛාන් මුහුණ දෙමින් සිටියේ තම ධූරකාලයේ දැවැන්තම අභියෝගයටය.  

නැගෙනහිර පාකිස්තානය පුරා මහජන විරෝධතා එන්න එන්නම පුළුල් විය. 1966 ජූනි 7වෙනිදා අවාමි ලීගය විසින් රට පුරා හර්තාලයක් කැඳවීය. ඒ කලාපීය ස්වයං පාලනයක් සඳහා වූ ඓතිහාසික කාරණා හයේ වැඩසටහනට සහාය දැක්වීම සඳහාය. හර්තාලයට සති කිහිපයකට පෙර එනම් මැයි

8වැනිදා පක්ෂයේ නායක බංගබන්ධු ෂෙයික් මුජිබර් රහ්මාන් අත්අඩංගුවට ගත් නමුත් අනෙකුත් නායකයන් සහ පක්ෂ ක්‍රියාකාරීන්  විසින් මෙම දීප ව්‍යාප්ත හර්තාලය කැඳවනු ලැබීය. එය ඉතාම සාර්ථක විය. අයුබ් ඛාන්ගේ ආණ්ඩුව විසින් බංගබන්ධු අත්අඩංගුවට ගත් අටවන අවස්ථාව එය විය. එය පෙර අවස්ථාවලදී කළ අත්අඩංගුවට ගැනීම්වලට වඩා වෙනස් විය. මන්ද, එවර ඔහු වසර තුනක් එනම් 1969 දක්වා සිරකොට තැබීමට පාකිස්තාන ආණ්ඩුව තීරණය කළේය. නායකයන් සිරගතකිරීම් සහ අනුගාමිකයින් මර්දනය කිරීම මඟින් ආණ්ඩුව බලාපොරොත්තුව වූයේ නිදහස් ව්‍යාපාරය කෙසේ හෝ  කඩා බිඳ දැමීමය. නමුත් ඒ වෙනුවට සිදු වූයේ බංගලාදේශ ජාතිකයන් ස්වයංපාලනය වෙනුවෙන් කළ සටන තව තවත් ශක්තිමත් වීම පමණි.

නිලන්ත ඉලංගමුව

කෝවිඩ් සමයතුළ දෙහිවල සත්වෝද්‍යානයේදී  උපත ලද  ඔරෙක්ස් ගවපැටියා , සිලූබූරු  පැටියා , හිපෝ පැටියා , බූරු පැටියා යන පැටවුන් සඳහා නම්තැබීමේ වැඩ සටහනක් සමග තෑගි ලබාදීමටද සැලසුම් සකස් කරනු ලැබිණැයි දෙහිවල ජාතික සත්වෝද්‍යානයේ අධ්‍යක්ෂක ජෙනරාල්  ශර්මිලා රාජපක්ෂ මහත්මිය පැවසීය.

දෙහිවල ජාතික සත්වෝද්‍යානයේ තිරසාර සංවර්ධන වැඩ සටහනට අනුව රුපියල් මිලියන 67 ක රජයේ ප්‍රතිපාදන යොදවා මීට වසර දෙකකට පෙර වැඩ ආරම්භ කර මේ වනවිට වැඩ අවසන් කර  ඇති  හිපෝ අරණ සදහා හිපෝ  සතුන් මුදා හැරීම සදහා  පැවති මාධ්‍යය හමුවේ අදහස් පලකරමින් එසේ පැවසීය .

සතුන්ගේ සුභ සාධන වැඩි කරමින් කූඩුවලින් බැහැරව ගතකලහැකි ඉඩකඩ සහිත සත්ව අරණවල් නිර්මාණය කර ඒ තුල සතුන්ට නිදහසේ ජීවත් වීමට ඉඩ සැලසීමත් සිදු කරනු ලබන බවත් , ඒ අනුව මේ වනවිටත් සිංහයන් සදහා සිංහ අරණත් , වදුරන් සදහා වදුරු දූපතක්ද ඇති කිරීමට කටයුතූ කර තිබන බවත් අධ්‍යක්ෂවරිය පැවසීය .

දෙහිවල එච්.එම්. ධර්මපාල

වසර 2,200 කට පෙර නිර්මාණය කරන ලද බුදු පිළිම ද්විත්වයක් හමුවූ පුවතක් විදෙස් මාධ්‍ය වාර්තා කර තිබේ.

අදාළ බුද්ධ ප්‍රතිමා චීනයේ වයඹදිග චීනයේ Shaanxi පළාතෙන් සොයාගෙන ඇති බව වාර්තා කර ඇත.

මෙම ප්‍රතිමා ද්විත්වය තඹවලින් නිර්මාණය කර ඇති බවද සඳහන් වෙයි.

ඉන් එක ප්‍රතිමාවක් හිටි පිළිමයක් වන අතර අනෙක් ප්‍රතිමාව තුල වැඩහිඳිනා පිළිම 5ක් අන්තර්ගතව් ඇත.

එහි දර්ශන පහතින්.

එළඹෙන ජනවාරි 01 වැනිදා සිට ශ්‍රී ලංකාවට පැමිණෙන සියලු මගීන්ට තම සෞඛ්‍ය තත්ත්වය ප්‍රකාශ කෙරෙන QR කේතය ස්මාර්ට් දුරකථනයට ඇතුළත් කර හෝ එහි මුද්‍රිත පිටපතක් රැගෙන එන ලෙස අනිවාර්යය කරන ලෙස සෞඛ්‍ය අමාත්‍යාංශය විසින් සංචාරක අමාත්‍යාංශයෙන් ඉල්ලීමක් කර තිබේ.

ඒ අනුව ගුවන්තොටුපළේදී සිදුවන මගී තදබදය අවම කිරීම සඳහා මෙම ඉල්ලීම සිදු කළ බව කොළඹ දී අද (15දා) පැවැති මාධ්‍ය හමුවකට එක්වෙමින් සෞඛ්‍ය සේවා අධ්‍යක්ෂ ජනරාල්, විශේෂඥ වෛද්‍ය අසේල ගුණවර්ධන මහතා ප්‍රකාශ කළේය.

කෙසේ වුවද අදාළ දෑ සිදු කර ගැනීමට නොහැකි වන මගියෙකු වුවහොත් අදාළ පෝරමය පුරවා මහජන සෞඛ්‍ය පරීක්ෂකවරුන්ට ඉදිරිපත් කර ගුවන්තොටුපළෙන් පිටව යා හැකි බවද හෙතෙම පවසා සිටියේය.

ඒ අනුව මේ පිළිබඳ වැඩිදුරටත් අදහස් දක්වමින් සෞඛ්‍ය සේවා අධ්‍යක්ෂ ජනරාල්වරයා සඳහන් කර සිටියේ,

"ශ්‍රී ලාංකියන් හෝ වේවා විදේශිකයන් හෝ වේවා ශ්‍රී ලංකාවට පැමිණෙන සියලු ගුවන් මගීන්ට ඔවුන් ශ්‍රී ලංකාවට පැමිණෙන විට ඔවුන්ගේ සෞඛ්‍ය තත්ත්වය ප්‍රකාශ කරන්න පෝරමයක් නිකුත් කරලා තිබෙනවා. මීට පෙර එම පෝරමය පුරවා නැත්නම් %ඔන්ලයින්^ ක්‍රමයට QR කේතයක් සකසා ගෙන ඒ ක්‍රම 02ටම එන්න අපි අවස්ථාව ලබා දුන්නා.

නමුත් අපි දැක්ක දේ තමයි පෝරමය පුරවලා එය ගුවන්තොටුපොළේ සිටින මහජන සෞඛ්‍ය පරීක්ෂකවරුන්ට පෙන්වීම සඳහා ගිය විට එතන ලොකු පෝලිමක් හැදෙනවා.

ඒ නිසා සෞඛ්‍ය අමාත්‍යාංශය මගින් සංචාරක අමාත්‍යාංශයෙන් ඉල්ලීමක් කළා ශ්‍රී ලංකාව වෙත පැමිණෙන සියලුම මගීන්ට එම QR කේතය, මෙරටට පැමිණීමට ප්‍රථම ඔවුන්ට ස්මාර්ට් ෆෝන් එකක් තියෙනවා නම් ෆෝන් ඒකට දාගෙන එන්න කියන්න, නැත්නම් එහි ප්‍රින්ට්අවුට් එකක් රැගෙන ආවොත් ගුවන්තොටුපොළේදී කිසිම රස්තියාදු වීමක් නොමැතිව විනාඩියකින් දෙකකින් මහජන සෞඛ්‍ය පරීක්ෂකවරුගේ පරීක්ෂාවෙන් පසු යන්න පුළුවන් කියලා.

කොහොම වුණත් කවුරුන් හෝ කෙනෙකුට ඒක කරගන්න බැරි වුණොත් ඔවුන්ව අපි කවදාවත් ප්‍රතික්ෂේප කරන්නේ නැහැ. ඔවුන්ට ඒ අදාළ පෝරමය පුරවලා ලියකිවිලි මහජන සෞඛ්‍ය පරීක්ෂකවරුන්ට පෙන්වා යන්න පුළුවන්" යනුවෙනි.

නිදර්ශනී වික්‍රමසිංහ

කොළඹ සහ ප්‍රදේශ කිහිපයකට සති අන්තයේ ජල සැපයුම අත්හිටුවීමට සිදුවන බව ජාතික ජල සම්පාදන සහ ජලාපවහන මණ්ඩලය සඳහන් කරයි.

නඩත්තු කටයුත්තක් හේතුවෙන් මෙලෙස ජල සැපයුම අත්හිටුවීමට සිදුවන බව ද ජල සම්පාසන මණ්ඩලය සඳහන් කරයි.

ඒ අනුව කොළඹ09,11,12,13 සහ 14 යන ප්‍රදේශන් සඳහා එලැඹෙන සෙනසුරාදා (18) උදෑසන 11.00 සට ඉරිදා (19) උදෑසන 8.00 දක්වා ජල සැපයුම අත්හිටුවීමට නියමිත බව සඳහන්.

ලොව වැඩිම වටිනාකමක් සහිත ක්‍රිකට් පිත්ත ලෙස ශ්‍රීමත් ඩොනල්ඩ් බ්‍රැඩ්මන් භාවිත කළ පිත්තක් පත්ව තිබේ.

ඒ මාර්ගගත ක්‍රමයට පැවති වෙන්දේසියකදී එය ඩොලර් 245,500කට වෙන්දේසි වීමත් සමඟය.

එය ශ්‍රී ලංකා මුදලින් ගතහොත් රුපියල් කෝටි 5කට ආසන්න මුදලකි.

මෙම ක්‍රිකට් පිත්ත වර්ෂ 1934දී අළු බඳුන ටෙස්ට් තරගාවලිය සඳහා ඔහු භාවිත කර තිබේ.

මෙම ක්‍රිකට් පිත්තේ ඇති තවත් විශේෂත්වයක් වන්නේ එහි පසුපස ශ්‍රීමත් ඩොනල්ඩ් බ්‍රැඩ්මන් විසින් සටහනක් තබා තිබීමය.

එහි සඳහන් වන්නේ හෙඩිංලි හිදී ලබාගත් ලකුණු 304 සහ ඕවල් ක්‍රීඩාංගණයේදී රැස්කළ ලකුණු 244 පිලිබඳවය.

මෙය ඔහු රැස්කළ වැඩිම ලකුණු සංඛ්‍යාව ලෙස සටහන් ව ඇත.

කොළඹ සෞඛ්‍ය නීති කැඩුවොත් රැපිඩ් ඇන්ටිජන්

පවතින කොවිඩ් 19 වසංගතය හමුවේ සෞඛ්‍ය මාර්ගෝපදේශ උල්ලංඝණය කරමින් කොළඹ නගරයේ හෝටල්හි සහ රාත‍්‍රී සමාජ ශාලාවන්හි හෝ නිවෙස්හි නත්තල් සාද සහ අලුත් අවුරුදු සාද පැවැත්වීම නොකරන ලෙස සෞඛ්‍ය අංශ මහ ජනතාවගෙන් ඉල්ලීමක් කරයි.

කොළඹ නගර සභා බල ප‍්‍රදේශයේ මෙවැනි සාද පවත්වන්නේ නම් ඒ ගැන දුරකථන අංක 0112/676161 වෙත දැනුම් දෙන ලෙස කොළඹ මහ නගර සභාවේ ප‍්‍රධාන සෞඛ්‍ය වෛද්‍ය නිලධාරී රුවන් විජයමුණි මහතා මහ ජනතාවගෙන් ඉල්ලා සිටියි.

එළඹෙන උත්සව සමයේ දී කොළඹ නගරයේ සෞඛ්‍ය නීති කඩකරමින් කටයුතු කරන ජනතාව රැපිඩ් ඇන්ටිජන් පරීක්ෂණවලට යොමු කිරීමට තීරණය කර ඇති බව ඔහු සඳහන් කරයි.

විශේෂයෙන්ම මුව ආවරණ නොපළඳින සහ පුද්ගල දුරස්ථභාවය ආරක්ෂා කරමින් කටයුතු නොකරන පුද්ගලයන් කෙරෙහි මෙහිදී විශේෂ අවධානය යොමු කෙරෙන බව ඔහු වැඩිදුරටත් පවසයි.

2021 වසරේ විශ්ව රූ රැජිණ කිරුළ ඉන්දියාවේ හර්නාස් සන්දු විසින් හිමි කරගෙන තිබේ.

මෙවර විශ්ව රූ රැජිණ තෝරාපත් කර ගැනීමේ තරගාවලිය ඊශ්‍රායලයේ දී 70 වන වරට පැවැත්වුණි.

එහිදී 21 හැවිරිදි වියේ පසුවන හර්නාස් සන්දු විශ්ව රූ රැජිණ කිරුළ දිනා ගැනීමට සමත් වී තිබේ.

ඒ අනුව, ඉන්දියාවට මෙවර විශ්ව රූ රැජිණ කිරුළ හිමිව ඇත්තේ වසර 21කට පසුව බව විදෙස් මාධ්‍ය වාර්තා කළේය.

කොළඹ දිස්ත්‍රික්කයේ ඉතාමත් වටිනා ඉඩම් දෙකක් විදේශීය ආයෝජක සමාගම් වෙත බද්දට දීමට අදාළ ගිවිසුම් සකස් කර ඇති බව සන්ඩේ ටයිම්ස් පුවත්පත පවසයි.

මෙම ඉඩම් දෙක බද්දට දීම හරහා රජය අපේක්ෂා කරන ආදායම ඇමෙරිකානු ඩොලර් බිලියනයකට ආසන්න වෙයි. නාගරික සංවර්ධන අධිකාරිය විසින් මේ සඳහා අවශ්‍ය කටයුතු සකස් කර තිබේ.

මේ අනුව ඉන්දීය ආයෝජකයෙකු වෙත දෙමටගොඩ ප්‍රදේශයේ අක්කර පහක ඉඩමක් ඇමෙරිකානු ඩොලර් මිලියන 200කට බද්දට දීමට නියමිත අතර එහි පෞද්ගලික රෝහල් ව්‍යාපෘතියක් ක්‍රියාත්මක කිරීමට නියමිතය.

චීනයේ හා ඩුබායි ඒකාබද්ධ ආයෝජනයක් ලෙසින් සමිට් ෆ්ලැට්හි නිවාස ව්‍යාපෘතියක් වෙනුවෙන් අක්කර 10ක් බද්දට දීමට නියමිත අතර ඒ හරහා අපේක්ෂා කරන ආදායම ඇමෙරිකානු ඩොලර් මිලයන 750කිග

මේ සඳහා වන අවබෝධතා ගිවිසුම් සකස් කර ඇති අතර එවා නීතිපති දෙපාර්තමේන්තුව වෙත යොමුකර ඇති බවද සන්ඩේ ටයිම්ස් පුවත්පත කියයි.

යාපනය නාවන්තුරෙයි ප්‍රදේශයේදි කිලෝ 300 කට ආසන්න බරකින් යුතු දුර්ලබ වර්ගයේ විශාල කැස්බෑවෙකු රැගෙන යමින් සිටි පුද්ගලයකු  අත්අඩංගුවට ගත් බවට යාපනය පොලිස් කොට්ඨාස අපරාධ විමර්ශන අංශය පවසයි.

කොට්ඨාස අපරාධ අංශයට ලැබුනු බුද්ධි තොරතුරකට අනුව නාවන්තුරෙයි ප්‍රදේශයේ මාර්ගයක කළ සෝදිසි මෙහෙයුමකදී සැකකරුවකු  අදාල කැස්බෑවා  කුඩා ලොරි රථයකින් පවාහනය කරමින් සිටියදී අත්අඩංගුවට ගෙන ඇත.

කැස්බෑවා යහපත් සෞඛ්‍ය තත්වයේ සිටීම හේතුවෙන්අද (12) දින යාපනය අධිකරණයට දැනුම් දී අධිකරණ නියෝගයන් යටතේ වනජීවි කාර්යාලයේද සහය ඇතිව නැවත මුහුදටම මුදා හැරීමට යාපනය පොලීසිය පියවර ගෙන ඇත.

අදාල කැස්බෑවා ඉතා දුර්ලබ ගනයේ අයෙකු වන අතරම ඉතා විශාල වන බවටද වාර්ථා වෙයි. මෙම කැස්බෑවා අධික මිලකට විකිණීම සඳහා රැගෙන යාමේදී මෙලෙස අත්අඩංගුවට ගත් බවට දිසා අපරාධ විමර්ශන අංශයේ නිලධාරීන් වැඩිදුරටත් පැවසූහ.

අත්අඩංගුවට ගත් සැකකරු නාවන්තුරෙයි ප්‍රදේශයේ පදිංචි 39 හැවිරිදි අයෙකු වන අතර සැකකරු කුඩා ලොරි රථයද කුලීපදනම මත ලබාගෙන කැස්බෑවා රැගෙන ගොස් ඇති බවටද අනාවරනය වී ඇත.

රොමේෂ් මධුෂංක සහ ඉන්දිකා රාමනායක

  

දක්ෂිණ අධිවේගී මාර්ගයේ කිලෝමීටර් 2.3 හා 2. 4 අතර කහතුඩුව හා කොට්ටාව අතර ප්‍රදේශයේ දී  අද 13 අළුයම කැබ් රථයක් සහ වෑන් රථයක් එකිනෙක ගැටී සිදු වූ අනතුර හේතුවෙන් කිලෝමීටර් දහයක් පමණ  දුරට දැඩි රථ වාහන තදබදයක් ඇති වූ බව අධිවේගී රථවාහන පොලිසිය කියයි 

 සිදුවූ අනතුරෙන් වෑන් රථයේ රියදුරු සහ කැබ් රථයේ සිටි පුද්ගලයකු ප්‍රතිකාර සඳහා හොරණ මූලික රෝහල වෙත ඇතුළත් කළ බව පොලිසිය කියයි.

කොළඹ දෙසට ධාවනය තිබූ කැබ් රථයක දකුණුපස රෝදය ආපදාවට ලක් වීමෙන් අනතුරුව කැබ් රථය ආපදා  තීරුවේ නතර කර තිබියදීඑම දිශාවටම ධාවනය වූ වෑන් රථයක් කැබ් රථයේ පිටුපස ගැටීමත් සමඟ වෑන් රථයේ මීටර් විස්සක් පමණ ඉදිරියට ඇදී ගොස් මාර්ගය මැද පෙරළීමෙන් මෙම අනතුර සිදුවී ඇතැයි පොලිසිය කියයි.

 

සිදුවූ අනතුරෙන් වෑන් රථ රියදුරු තුවාල ලබා ඇති අතර කැබ් රථයේ සිටි පුද්ගලයකු කම්පන තත්ත්වයෙන් පසු වූ බව පොලිසිය කියයි. අද පෙරවරු 6.40ටපමණ සිදුවූ මෙම අනතුර හේතුවෙන්  අනතුර සිදු වූ ස්ථානයේ සිට ගාලු දෙස සිට කොළඹ දෙසට ගමන් ගන්නා මංතීරුවේ වාහන ගැලනිගම දක්වා පෙළ ගැසී තිබූ බව වාහන රියදුරෝ පවසති.

 

මෙම අනතුර වෑන් රථ රියදුරුගේ අපරික්ෂාකාරි රිය ධාවනය හේතුවෙන්  සිදුවී ඇතැයි පොලිසිය කියයි.

 

බිමල් ශ්‍යාමන්

පාකිස්තානයේ සියල්කොට් හිදී ප්‍රියන්ත කුමාර මහතා ඝාතනය කිරීමේ සිද්ධිය පිළිබඳව නඩුව දිනපතා විභාග කිරීමට පන්ජාබ් පළාත් ආණ්ඩුව තීරණය කර තිබේ.

නීති අමාත්‍ය මුහම්මද් බෂාරත් රාජාගේ ප්‍රධානත්වයෙන් පැවති නීතිය හා සාමය පිළිබඳ පළාත් කැබිනට් කමිටු රැස්වීමේදී එම තීරණය ගෙන ඇති බව විදෙස් මාධ්‍ය වාර්තා කළේය.

ප්‍රියන්ත කුමාර මහතා ඝාතනයට ලක්කිරීම සම්බන්ධයෙන් වන නඩුව දින 14ක කාලයක් තුළ අධිකරණය හමුවේ ගොනුකරන ලෙස ද දැනුම් දී ඇති බව සඳහන්ය.

එමෙන්ම නඩු විභාගය නිරීක්ෂණය කිරීම සඳහා විශේෂ මැදිරියක් පිහිටුවීමට ද පළාත් කැබිනට් කමිටු රැස්වීමේදී තීරණය කර තිබේ.

එහිදී අදාළ ඝාතනය සම්බන්ධයෙන් අත්අඩංගුවට ගෙන සිටින සැකකරුවන් පිළිබඳව සවිස්තරාත්මක වාර්තාවක් ඉදිරිපත් කර ඇති අතර නිදැල්ලේ සිටින සැකකරුවන් නුදුරේදීම අත්අඩංගුවට ගන්නා බව පංජාබ් ප්‍රාදේශිය පොලීසිය දැනුම් දී ඇත.

එමෙන්ම සැකකරුවන්ට එරෙහිව ගොනුකර ඇති නඩුවේ විභාගය බන්ධනාගාරය තුළ සිදුකිරීම සම්බන්ධයෙන් ද එම හමුවේදී අවධානය යොමුව තිබේ.

නි‍යෝජ්‍ය පොලිස්පතිවරුන් තිදෙනෙකුට සහ වැඩබලන නියෝජ්‍ය පොලිස්පතිවරුන් තිදෙනෙකුට වහාම ක්‍රියාත්මක වන පරිදි ස්ථාන මාරුවීම් ලබාදී තිබේ.

මහජන ආරක්ෂක ලේකම්වරයාගේ අනුමැතිය පරිදි රාජ්‍ය සේවා කොමිෂන් සභාවේ අනුමැතියට යටත්ව සේවයේ අවශ්‍යතාවය පරිදි එම ස්ථාන මාරුවීම් ලබාදී ඇති බව පොලිස් මූලස්ථානය සඳහන් කළේය.

ඒ අනුව, නුවරඑළිය දිසාව භාර නියෝජ්‍ය පොලිස්පතිවරයා ලෙස කටයුතු කළ නියෝජ්‍ය පොලිස්පති වී. ජී. ඩී. ඒ. කරුණාරත්න මහතා අපරාධ දිසාව භාර නියෝජ්‍ය පොලිස්පතිවරයා ලෙස පත්කර තිබේ.

නියෝජ්‍ය පොලිස්පති ඊ. එම්. යූ. වී. ගුණරත්න මහතාට ප්‍රජා පොලිස් හා පරිසර ආරක්ෂක දිසාව භාර නියෝජ්‍ය පොලිස්පති තනතුරට අමතරව නාවික හා සංචාරක දිසාව භාර නියෝජ්‍ය පොලිස්පති ධුරයේ රාජකාරි ආවරණය සඳහා පත්කර තිබේ.

නියෝජ්‍ය පොලිස්පති එස්. ඩබ්. එම්. සේනාරත්න මහතා නාවික හා සංචාරක දිසාව භාර නියෝජ්‍ය පොලිස් තනතුරේ සිට මාතර හා හම්බන්තොට දිසාව භාර නියෝජ්‍ය පොලිස්පති ලෙස පත්කර තිබේ.

මේ අතර කිළිනොච්චිය දිසාව භාර නියෝජ්‍ය පොලිස්පතිවරයා ලෙස කටයුතු කළ වැඩබලන නියෝජ්‍ය පොලිස්පති ජේ. එස්. වීරසේකර මහතා රත්නපුර දිසාව භාර නියෝජ්‍ය පොලිස්පතිවරයා ලෙස පත්කර ඇති බව පොලිස් මූලස්ථානය පැවසීය.

වැඩබලන නියෝජ්‍ය පොලිස්පති එස්. පී. රණසිංහ මහතා පොලිස් මූලස්ථානයේ සිට නුවරඑළිය දිසාව භාර නියෝජ්‍ය පොලිස්පතිවරයා ලෙස පත්කර තිබේ.

එමෙන්ම අපරාධ දිසාව භාර නියෝජ්‍ය පොලිස්පති තනතුරේ කටයුතු කළ වැඩබලන නියෝජ්‍ය පොලිස්පති එච්. සමුද්‍රජීව මහතා කිලිනොච්චිය දිසාව භාර නියෝජ්‍ය පොලිස්පතිවරයා ලෙස මාරුකර ඇති බව පොලිස් මූලස්ථානය සඳහන් කළේය.